تامر شاهين يكتب: يوميات صيدلى فى الأرياف.. "الأخيرة"

مسا مسا
أحلى مسا عليكو
أنا قضيت يومى النهاردة فى الصيدلية فى كفر سندوس البهواية وأنا بحاول أرتب كل حاجة وأخلص كل الفواتير والالتزامات المالية قبل ما آخد أجازتى بتاعة الجواز
انا أديت لنفسى إجازة أسبووووع بحاله
مش حلو كدة ولا إيه ؟
أحسن برضو من حنفى بتاع مسرحية سك على بناتك .. ههههههه
طول النهار من ساعة ماجيت الصبح لغاية دلوقتى عمال اشتغل وأقابل الناس والشركات وأخلصهم وأظبط كل حاجة وبعد ما خلصت كل الالتزامات وظبطت كل حاجة فعلا إديت لسليمان الإجازة بتاعته لمدة اسبوع هو كمان ومشى
بعدها مسكت الورقة والقلم وقلت اكتبلكو بقا الحلقة الأخيرة من اليوميات
فضلت ماسك الورقة والقلم وبحاول أكتب الحلقة الأخيرة وأفكر فيها... راحت جايه لى مكالمة على الموبايل
دى نمرة عهد
- ألوووو ...ازيك يا عروسة ؟
- إزيك إنت يا عريس ؟ إنت فين ؟
- لسه فى الصيدلية ما مشيتش .
- يااااه .. إنت قاعد لغاية دلوقتى ليه ؟ بكرة الحنة ولسه أدامك حاجات كتير ما خلصتهاش
- ما أنا كنت قايم خلاص بس كنت بحاول أكتب الحلقة الأخيرة بتاعة اليوميات بس لسه ماكتبتش حاجة لغاية دلوقتى
- عارف ؟ ... يومياتك دى ح أفضل محتفظة بيها لغاية ما ولادنا يكبروا ويعرفو يقروها وح أقوللهم أبوكو تعب قد إيه علشان تبقوا كويسين وكمان ح أقوللهم إن ربنا كرمه بيا .. ولا إيه ؟ عندك شك يعنى ؟
- هههههههه لا طبعا .. معنديش أى شك .. وأنا مستعد أقول الكلام دة لكل الناس من كبيرهم لصغيرهم ... بس إنتى عارفة ؟ انا مبسوط إنى كتبت اليوميات دى علشان أعرّف الناس الحاجات اللى بتدور فى الصيدليات وكمان علشان يشوفوا مناطق ما شافوهاش قبل كدة وممكن كمان عمرهم ما يشوفوها ولا تقابلهم .. وكمان أوجه رسائل للناس وللمجتمع
- أهااا ... إنت عملت كدة فعلا
- أنا حبيت اقول للشباب إن لكل مجتهد نصيب ولو أى واحد عاوز يشتغل فى العمل الحر ... كل اللى عليه حاجتين .. أول حاجة إنه يشتغل فى المجال اللى بيفهم فيه، وتانى حاجة إنه يقعد فى شغله ويلتزم وينضبط وما ييأسش ولا يملّش وكل حاجة ربنا ح ييسرها له إن شاء الله
- أها المهم يلتزم فعلا ...
- كمان حبيت أقول لرجال الأعمال إنهم عليهم دور مجتمعى ما ينفعش يتخلو عنه ولازم إيديهم تبقا فى إيدين الناس علشان نطلع كلنا مع بعض
- أها فعلا .. ناس كتير فى مصر بيعملو كدة وناس أكتر ما بيعملوش
- المجتمع لازم يتكاتف مع بعضه وما نسمحش أبدا لحد إنه يقسمنا ولا يفرقنا
- طبعا لازم
- و كمان لازم كدولة نشوف مشكلة الإدمان والمدمنين ونحلها
- أكيد
- وكمان لازم الناس تعرف إن كل مكان فيه الحلو وفيه الوحش ولازم نتمسك بالحلو ونحاول نخلى الوحش كويس
- أها وإيه كمان ؟
- وكمان زيادة الوعى فى الموضوع اللى إحنا طبعنا له الفلايرات .... فاكرة ؟
- طبعا فاكرة ..
- بس ..
- طيب إكتب .. اكتب كل حاجة وما تخليش قلمك بخيل .. اكتب واملا الدنيا كتابة ... وابعت رسايل للمجتمع والناس ويا ريت الناس كلها تعمل زيك بالطريقة اللى تعرفها .. أنا مبسوطة بيك
- ربنا يخليكى ليا يا عهد
- و يخليك ليا يا حبيبى ... يا لهوى
- إيه فيه إيه ؟
- الساعة بقت 8 ومعادى عند الكوافير 8 ونص ولسه ما خلصتش لبس ....
- هههههههههههههه
- بتضحك ؟ ماشى ماشى ... خلص كتابة وما تتأخرش علشان وراك حاجات كتير سلام
- سلام
أنا كمان بقوللكو سلام وإن شاء الله نتقابل تانى ... يمكن ... محدش عارف ..
دمتم بخير
سلامو عليكو