وفيما يلى نص التحقيقات:
س/ ما هى تفصيلات بلاغك؟
ج/ اللى حصل إن أنا كان عندى تحقيق فى إحدى القضايا فى محكمة مدينة نصر، وجيت متأخر لأنى كنت جاى من محافظة الشرقية، وكان فى حد من المحامين اللى موجودين معايا فى القضية داخل التحقيق، وأعطيت الكارنيه بتاعى للحرس، وقالى التحقيق باقى فيه 5 دقايق وفيه محامى زميلك حاضر التحقيق، بعد شوية لقيت المتهم المعروض خارج من التحقيق وبرفقته زميلى أحمد قطب المحامى" .
وأضاف المجنى عليه: " وحصلت مشاداة كلامية بين أحمد عز سكرتير النيابة وبين أحمد قطب المحامى، لأن أحمد قطب طلب من الحرس يهوى الكلابش من إيد المتهم شوية لأنه كان ضيق جدا وزانق إيده، لكن أحمد عز السكرتير اعترض، وقال للحرس متفكش الكلابش ولا تهويه، فحصلت المشاداة بين أحمد قطب والسكرتير، وحاولت أدخل علشان أهدى الموقف بين الطرفين، فالسكرتير سألنى إنت مين ؟ قولتله أنا محمد الجمل المحامى وجى علشان التحقيق ده".
وتابع: " فالسكرتير قالى صباح الفل ياباشا مفيش أى اصطباحة، فأنا قولتله صباح الفل وكل سنة وأنت طيب، إحنا فى رمضان، فراح السكرتير أبعدنا عن المتهم بطريقة غير لائقة بعد ما حاولنا أن نسلم عليه ونتكلم معاه، وراح قال لنا بصوت عالٍ ابعد يا باشا أنت وهو ولا علشان السيسى اعتذرلكوا هتتنططوا علينا" .
واستطرد المجنى عليه: " اتجددت المشاداة مرة تانية بين الطرفين، وقميصى اتقطع من شد السكرتير، وخرج بعض الموظفين والحرس ومنهم واحد كان ماسك حزام فى إيده، وحاولوا يتعدوا علينا بالضرب، وكان عددهم كبير، وكانوا عاوزين يمسكونى أنا وأحمد، بس أنا حاولت أجرى منهم من السلم الخلفى لوكلاء النيابة، وهم فضلوا يجروا ورايا من الدور السادس، وفى الدور الخامس قابلنى أمين الشرطة، وفضل أحمد عز السكرتير يقول (امسك حرامى)، (متهم هارب)".
وأضاف المجنى عليه: " فأنا طلعت المحفظة من جيبى وأنا بجرى عشان أطلع منها البطاقة، وفضلت أقول بصوت عال أنا مش حرامى أنا محامى علشان محدش يعترضنى وفضلت أكرر الكلام ده أكتر من مرة، والدليل على كدة إنهم لما لقونى مرمى على الأرض لقوا المحفظة مرميه جمبى مش فى جيبى، ولما نزلت على الدور الرابع قام الأمين ضارب طلقة جت فى كتفى خرجت من صدرى، لأن أنا كنت تحت وهو ضاربها من فوق، ولما حاولت أنزل، شفت الدم بينزل بغزارة واترميت على الأرض، ومعرفش إيه اللى حصل بعدها".
موضوعات متعلقة..
خروج المحامى المصاب بطلق نارى بمحكمة مدينة نصر من المستشفى.. ونقابة المحامين تطالب بإحالة أمين الشرطة للمحاكمة الجنائية.. و29 يوليو نظر تجديد حبسه.. وسامح عاشور: إجراءات ندب قاضى التحقيق لم تنتهِ
تم أضافة تعليقك سوف يظهر بعد المراجعة