"جدو الصغير" فتح قلبه لـ"اليوم السابع"، وتحدث عن كواليس انضمامه للقلعة الحمراء خلال المريكاتو الصيفى.
- فى البداية.. ما حقيقة أزمة عقدك مع الاتحاد السكندرى؟
أنــا عقدى الرسمى مع نادى الاتحاد السكندرى ينتهى فى 2015، واى كلام غير كده مش صح، وانا مضيت العقد، عندما كان محمد مصليحى يتولى رئاسة النادى، وكان اجمالى العقد الخمس سنوات بمبلغ 225 ألف جنيه، وتم تعديل العقد فى خلال فترة رئاسة الدكتور عفت السادات وأصبح مليون و800 ألف جنيه ،ولكنه لم يوثق فى اتحاد الكرة ويعتبر مزور، لأن فترة التوثيق فى الجبلاية، تتم خلال 30 يوماً من التوقيع ولكن الإدارة لم توثقه وقتها وبهذا يعتبر لاغ.
- جماهير الاتحاد اتهمت محمد بسطاوى بضياع حق النادى؟
محمد بسطاوى، مدير شئون اللاعبين بــريء من التهمة دى، وأبلغ إدارة النادى بضرورة توثيق العقد، وقدم 12 مذكرة يثبت فيها صحة كلامه، وأرسلها إلى مجلس الإدارة "الراجل يعمل إيه أكتر من كده".
- العلاقة بينك وبين جماهير الاتحاد أصبحت متوتــرة بعد توقيعك للنادى الأهلى؟
أنا متعود من الجماهير على كده، والدليل على كلامى إن السنة اللى فاتت الجماهير طالبت برحيلى وكانوا غير راضين عن مستوايا، والسنة دى الكلام كله اتغير والكل عايزنى استمر فى النادى، وأنا عايز أوضح حاجة أن جماهير الاتحاد السكندرى ليست مجموعة الأشخاص اللى على الفيس بوك، فقط دول قلة، وجماهير الاتحاد المحبة والعاشقة للكيان أكبر من كده بكتير.
- فى اتهام واضح من جماهير الاتحاد بأنك "قليل الأصل"؟
نادى الاتحاد السكندرى هو اللى عملنى، وصاحب فضل عليا، وعرفنى بالناس كلها، وخلى محمد حمدى له اسم فى الدورى، وخاصة إنى دخلت النادى وعمرى 13 سنة ولعبت فى مراحل الناشئين كلها، وعمرى ما اقدر أنكر ده يبقى إزاى قليل أصــل.
- ما طبيعة العلاقة بينك وبين مجلس الاتحاد بعد توقيعك للنادى الأهلى؟
محدش رفع سماعة التليفون وكلمنى، وقالى تعالى نشوف انت عايز إيه، نتفق ونوصل لحل بشكل يليق باسم نادى الاتحاد ومصلحته، وربنا يستر على النادى.. وعايز أوضح حاجة لجماهير الاتحاد، فى بداية السنة ذهبت لـمحمد البحيرى، عضو مجلس إدارة النادى، وطالبت منه تعديل العقد، بعد تأكد بانتهائه نهاية الموسم الحالى، ولكن الإدارة "عملت ودن من طين وودن من عجين"، وكمان وأنا قاعد مع علاء عبد الصادق ،مدير الكرة بالنادى الأهلى، اتصلنا بالدكتور محمود مشالى، رئيس نادى الاتحاد، ووقتها قبل التوقيع علشان نوصل لحل، ولكنه أصر على صحة موقفهم باستمرارى معهم موسم آخر وأغلق التليفون.
- إدارة الاتحاد بتقول إن معاها ورق رسمى بتوقيعك معاهم لمدة سنة أخرى وسيتم قيدك فى القائمة الأولى.. ما ردك؟
أتحدى أن إدارة الاتحاد تمتلك الأوراق الرسمية التى تثبت احقية الاتحاد باستمرارى موسم آخــر، واللى معاه حاجة يطلعها، واصلاً مفيش عقد رسمى فى اتحاد الكرة بينى وبينهم.
- فى حالة اثبات إدارة الاتحاد صحة توقيعك لمدة سنة أخرى.. سيتم ايقافك.. ما ردك؟
موقفى سليم من الناحية القانونية ،وانا لاعب حــر، وعقدى ينتهى فى 2015، ومن حقى أمضى لاى ناد سواء فى مصر أو خارجها، فكيف سيتم إيقافى؟
- ما الذى يحتاجه زعيم الثغر ليصبح فريق بطولة؟
مشكلة النادى الأساسية مشكلة مادية فى الامكانيات، وبعدها تأتى مشكلة الملعب، وعدم الاستقرار، والإدارة غير صاحبة قرار، بالإضافة إلى الصفقات اللى بتيجى النادى أغلبها "درجة تانية"، وكل دى مشاكل بتواجه الاتحاد، فمن الصعب أن يكون فريق بطولة إلا فى حالة واحدة وهى توفير وحل كل هذه المشاكل.
- ما رد فعل التوأم بعد علمهما بتوقيعك للأهلى؟
محدش كلمنى منهما، ولاكــان فى رد فعل أصلا، والعلاقة طبيعية جداً بينا.
- مين صاحب فضل عليك وخاصة بعد ظهور بمستوى لافت للنظر الموسم الحالى؟
ربنا فى البداية، ثم العميد حسام حسن صاحب فضل كبير عليا خلال الموسم الحالى، وساهم فى تطوير مستواى بصورة كبيرة، وقدم لى نصائح كثيرة، وله بصمات واضحة مع كل لاعب فى الاتحاد السكندرى، واشتغلت على نفسى الموسم ده علشان أظهر بالمستوى اللافت لنظر الجميع.
- متى بدأت مفاوضات الأهلى معك.. وعن طريق مين؟
منذ يناير الماضى، عن طريق أنور شلوفه، وكيل اللاعبين، عندما عملت بان عقدى غير موثق، ويحق لى الانتقال كلاعب حــر.
- متى تنتقل إلى صفوف الأهلى بشكل رسمى؟
أبلغت مسئولو النادى الأهلى، بوجود عرض سعودى لى، وفى حالة وصوله، سأنتقل إلى الدورى السعودى، وفى حالة عدم اكتمال العرض الرسمى مع النادى السعودى، سأصبح لاعباً بصفوف النادى الأهلى من بداية الموسم الجديد.
- كيف ترى فرصتك فى الأهلى فى ظل تعاقد الإدارة الحمراء مع إيفونا وأنطوى؟
أنتظر تحدى جديد فى الأهلى، ومش قلقان من وجود ماليك إيفونا وجون أنطوى، والملعب هو الفيصل اللى بيحدد مين يلعب أساسى ولا.
- عقدك فى الأهلى من الناحية المادية يرضى طموح
ك؟الحمد لله.. أنا راضى.. وللعلم أنا ما اتكلمتش مع المسئولين فى الأهلى فى أى فلوس، وكفاية التقدير اللى حسيته لما جلست معهم، بعكس الاتحاد مفيش تقدير ووعود كتير ومفيش تنفيذ.
- الأهلى أخر خطوة فى طموحك؟
طموحى ليس له حدود، ونفسى احترف فى الدورى الإنجليزى.
