تامر شاهين يكتب: يوميات صيدلى فى الأرياف.. الموضوع كبير

مساء الخير
إزيكو؟
النهاردة الخميس
عهد جت تاخد الشفت بتاعها وأنا زى ما قلتلكو قبل كدة عهد بتيجى من هنا وتلاقى الصيدلية اتملت من هنا.
أنا كمان رتبت مع الحاج خليل نروح نزور الدكتور حفناوى فى بيته
أخدت بعضى من بعد صلاة العشا ورحت للحاج خليل فى بيته، ونزل ركب معايا عربيتى ورحنا سوا للدكتور حفناوى، بس عم خليل سابنى أدخل لوحدى ومشى هو راح مكان تانى.
البيت شكله يجنن من برة ومن جوة حكاية.. مش معقولة يكون ده من فلوس شغله فى الحكومة
أكيد الدكتور حفناوى ده من عيلة غنية أو دى بقا فلوس الخليج إذا كان اشتغل هناك
ابنه اللى فتح لى الباب البرانى وقاللى
- اتفضل يا عمو بابا نازل لك حالاً
الدكتور حفناوى عامل الشقة اللى تحت عيادة وباقى البيت له ولأولاده
دخلنا أوضة الضيوف اللى هى أوضة المسافرين.. زى ما بيقولو عليها هنا فى الأرياف ودى أوضة فى الشقة اللى تحت.. جنب أوضة الكشف
صالون مدهب بس موضته قديمة شويتين
دخل عليا الدكتور حفناوى يا عينى ساند على العكاز بتاعه
- السلام عليكم يا د.هاشم
- وعليكم السلام يا د.حفناوى، ألف سلامة عليك، معلش معرفتش أجيلك فى المستشفى، اعذرنى، أنا مكنتش ناسى، بس والله انشغلت عنك معلش
- لا ولا يهمك.. كفاية إنك زرتنى هنا
- ألف سلامة عليك
أخدنا وادينا فى الكلام ييجى ساعة ولا أكتر.. راجل محترم أوى الدكتور حفناوى ده..
المهم خرجت من عنده وكان مستنية فى العيادة ست كبيرة فى السن ومعاها بنت عروسة صغيرة كدة
رحت على الصيدلية
وجتلى فكرة كده
أنا ليه ما اعملش فى الصيدلية خدمة الديليفرى؟
والله فكرة كويسة
أنا أشترى عجلة لسليمان وأشغله بيها طيار
بس طبعا طيار عادى
علشان كدة مرتبه ح يبقا زى ما هو، يعنى مش هيبقى زى مرتبات الطيارين بتوعنا
دخلت الصيدلية ولقيت عهد مش ملاحقة على العيانين . وقفت ساعدتها
وشوية ولقيت مين داخل علينا؟
الست والبنت اللى شفتهم عند الدكتور حفناوى
- أيوة يا حاجة أؤمرى
- معلش يا ابنى عاوزة أرجع الحاجات اللى انا أخدتها دى
- ليه يا حاجة إيه اللى حصل؟
- معلش والنبى.. اصل البت متوترة ولما شافت الحاجات دى خافت وما رضيتش
- متوترة؟!
الحاجات اللى الست دى كانت عاوزة ترجعهم يبقوا شاش وقطن وأمبولات بنج موضعى وسرنجات ومشرط
أنا الصراحة ما حطيتش فى دماغى ورجعتلها الحاجة اللى كانت بتقول عليها وخلاص
بعد ما الست خرجت لقيت عهد وشها بقا أحمر زى الطماطماية
- مالك يا عهد فيه إيه؟ انتى وشك متغير كدة ليه؟
- انت أخدت بالك من اللى الست دى قالته؟
- إيه؟ هى قالت إيه؟ دى كانت عاوزة ترجع اللى اشترته
- طب ما أخدتش بالك هى ليه عاوزة ترجع الحاجات دى؟
- لأ.. ليه هو فيه إيه؟
- عارف؟ ... دى كانت ح تبقى عملية ختان
- لا والله؟ طب إيه الللى خلاكى تقولى كدة؟ ما يمكن تكون أى جراحة تانية
- انت ما شفتش الست كان وشها عامل إزاى وهى بتقولك إن البنت متوترة وما رضيتش؟ دى كانت مكسوفة ومش عارفة تتكلم
مش عارف أقول إيه؟ يمكن عهد عندها حق ويمكن لأ؟
أنا مش عارف
أصل الروشتة دى عادى ممكن تتطلب فى أى جراحة مش شرط موضوع الختان دة
عهد: إنت ح تسكت؟
- أمال إيه؟ أعمل إيه؟
- أنا ح اشتكيه
- تشتكى مين؟ وهو عمل لك إيه؟
- انت مش عارف إن الدكتور اللى بيعمل كده بيتشطب من النقابة ويترفد من شغله.. إنت عارف كمان إن الجراحة دى ما بيدرسوهاش فى كلية طب؟ يا هاشم الموضوع كبير
- أيوة طبعًا عارف الكلام دة , بس برضو إحنا مش متأكدين إن الحاجة دى كانت ح تحصل
- طيب روح ورا الست دى واسألها
- يا سلام.. وانتى فاكرة ان الست ح تقوللى كدة بكل بساطة لو دة فعلا كان صحيح؟
- انت ما تعرفش الموضوع دة مؤذى قد إيه ؟
- ليه يا بنتى ؟ هو أنا من كوكب تانى؟ عارف طبعًا
- و انت طيب ح تعمل إيه ؟
- أعمل إيه فى إيه؟ انتى اللى عندك دى شكوك وبعدين أنا عاوز اقوللك ان الناس دول بيعملو الكلام دة بمزاجهم مش غصب عنهم .. يعنى ممكن تبقا مشكلة كبيرة لو اشتكيتى وفى الآخر تطلعى إنتى اللى غلطانة
- ما هما بيؤذو بناتهم بأيديهم
- هما بيعملو كدة علشان عندهم اللى يقوللهم إن ده صح
- يبقا لازم يحصل توعية لأهل البلد هنا بخصوص الموضوع ده
- أيوة هنا بقا نتفق , عاوزة تعملى توعية إزاى ؟
- إحنا نطبع فلايرات ونوزعها لزباين الصيدلية جوة كل كيس ومع كل روشتة بخصوص الحكاية دى
- والله فكرة.. معنديش مانع
- خلاص يبقى اتفقنا
- اتفقنا
إحنا صحيح معندناش أى دليل يثبت إن الختان كان ح يحصل بس إحنا مبسوطين أنا وعهد إننا ح نعمل واجب مجتمعى ناحية الناس هنا فى كفر سندوس البهواية
لو كل واحد فينا عمل واجب مجتمعى ناحية شارعه أو قريته أو مدينته ح نبقا فى مصاف الدول العظمى
ياللا
أقابلكو بقا فى الحلقة الجاية إن شاء الله
دمتم بخير
سلامو عليكو