وإزاى هأواصل شىء ماهوش موصول
ولامتى هأفضل فيكى مش فيكى
ولامتى هأفضل مبنى للمجهول
ع الضحك عامل قرد بصديرى
ع الصمت قمت بدور جدع غيرى
ع الفرح مش قادر يطير طيرى
ع العشق عامل روحى قدرة فول
هأعمل لك إيه أكتر من المعمول
وهأقول لك إيه أكتر من الحاصل
وصلوا المراكب للشطوط فاضيين
والهمّ طايح فيكى ومواصل
وصلوا المراكب واللى شالك طين
حطّك فواصل بين كلام فاصل
ماشية المفاصل زى يوم الدين
وصلات وجع فى طريق ماهوش واصل
باعنا البخيل لبخيل بقرطاس تين
مات البخيل ولسانه بيفاصل
هأعمل لك إيه أكتر من المعمول
وهأقول لك إيه أكتر من المنقول
المسأله أصعب من الإجابات
والكلمه أوسع من دولاب القُول
الخيط فى رُكبة ستّى متخبّل
والغزل فى إيدين ستّى مش ع النّول
والحلم فى عيون الغلابه شعاع
فارق معاهم فى المقاس والطّول
ع الحزن متدرّب ومتراهن
ع الصوت مصاحب صوتك الواهن
ع الظلم عايش حزننا الراهن
ع الكُره عايش عقربة ف بندول
هأعمل لك إيه ما انا أرغمونى أكره بدون أعذار
وأعشق بلا رغبه
وامّا ألعن الغير فيكى بأستغبى
أعمل لك إيه ما انا أجبرونى على السكات والخوف
وساقونى فى السوق زى أى خروف..
واتسلّوا بلجامى
مسحوب وتايه وانتى قدّامى
مضّطر لحظة ما الكلام يسخن
أصرخ يعيش الدّم والدّامي
هأعمل لك إيه أكتر من الحاصل
تسلم إيدين مندوبك السّامى
موضوعات متعلقة..
"الحكايه فيها إنّ" قصيدة جديدة لـ"سعيد شحاتة"
تم أضافة تعليقك سوف يظهر بعد المراجعة