سامح لطف الله يكتب: صحّى ضميرك

اوعى تحط دماغ فى الرملة
وتسك القفل عليه وتفوق
شجر الحلم بيكبر شمسى
كبت الحلم يموت مخنوق
ادى لحلمك كل مساحته
سيبه بينمو ينمو براحته
اوعى تقول لطموح ستوب
واروى طموح بالعلم يرعرع
واقتل جبن الخوف ووقاحته
واطرد جهل الجاهل برة
إياك مرة تتوه فى نصاحته
نصح الجاهل سم زعاف
خدم العالِم كل فصاحته
افحت بيرك لو بالإبرة
صبرى عليه هيخلص فحته
خرّج مخك م الصندوق
لف الدنيا ودوق فى عسلها
اوعى تآمن يوم لكسلها
مهما الهم عليك هيزيد
اقتل حزن بكف حديد
تلقى الخير يملالك راحته
عيش الدنيا بكل أملها
ربك خلق الكون وفساحته
تحبس نفسك ليه فى القمقم
دمّر جهل مميت ووقاحته
ما تسلمش دماغ لمنحنح
أو تتغر فى دقن سماحته
لو محتاج الصوت يجريلك
تجرى عليه !! ماخلاص نجّحته
صحّى ضميرك يلا وصحصح
قطمة يا ناس أفضل من نحتة