محمد البحراوى يكتب: يا سفينة

يا سفينة يا معدية على بلادنا
فى قناتنا على دوربنا وحوارينا
تعالى نفتش فى تواريخنا
تعالى احكيلك حكاوينا
احنا المصريين
أقباط ومسلمين
وعلى أرضها عايشين
لا عمرنا قلنا النصيب فاتنا
ولا يوم شمتنا العدا فينا
بنينا الأهرام على أكتافنا
حفرنا القنال بإيدينا
رفعنا السد على راسنا
وفى ثورتك روح شهيد فينا
....
مفيش مانع نتعتر مرة
يخدنا الغرور مرة
نحس إن الحياة مرة
لكن بنقوم
ننفض التراب تانى
نمسك السلاح تانى
ننفض من قلوبنا هموم
نفوق ونصرخ الله أكبر
تهز الكون
تخلى عدونا ينهار
يسيب الأرض لصحابها
يصير مجنون
نرجع أرضنا تانى
نعمر فيها من تانى
نرزع أرضها زيتون
....
وبدل القناة نعمل قناة تانى
فى سنة واحدة بالإصرار
المصرى لو حط حاجة فى دماغه
ليوصلها لو فى النار
خلاص مفيش حاجة ترجعنا
بلاش كلام بلا معنى
مصر حراسها ربنا الأعلى
وجيشها على عدونا جبار
......
هى دى الحكاية يا سفينة
السنة الجاية بإذن الله
هتيجى تعدى يا سفينة
فى قناتنا ، على دروبنا وحوارينا
لكن المرة الجاية بافعالنا
هتكونى حفظتى حكاوينا .