محلب وجاريدو

حد فيكم يعرف إيه الفرق ما بين المهندس إبراهيم محلب رئيس الوزراء  وخوان جاريدو مدرب الأهلى؟
بص ياسيدى.. الكورة فى مصر زى السياسة، اللى بيحصل هنا هو اللى بيحصل هناك، يعنى لاعيبة الأهلى من غير روح، وبتوع السياسة وزراء ومسؤولين وبتوع أحزاب برضه من غير روح.

لاعيبة الأهلى بيجروا فى الملعب تحسهم راضيين بالنتيجة، والمسؤولين عندنا فى مصر برضه بيجروا فى الشوارع والمصالح الحكومية بأداء روتينى كده يخليك تحس بأنه راضيين باللى بيحصل.

المدير الفنى بتاع الأهلى متحمس وبيتنطط، ومش راكز فى مكان على الدكة، والمهندس إبراهيم محلب برضه متحمس وعمال بيجرى من مكان للتانى بس لما بيبدأ الماتش لا بنلاقى فريق عارف يشتغل مع بعضه، ولا بتلاقى خطة.

المشكلة فى المستطيل الأخضر.. شبه المشكلة اللى فى القصر العينى بالضبط حيث مقر الحكومة.. هنا راجل كويس وتاريخه الكروى تقيل.. بس مش نافع مش عارف يدى.. مش منطقته.. مش زمنه، وهناك راجل كويس وبيتعب وتاريخه المهنى تقييل، بس جهد فريقه وحكومته مش واضح.. مش عارف يبلوره، مش منطقته.
جاريدو نفسه ينجح، ومخلص بجد باين عليه، والمهندس محلب نفسه ينجح ومخلص بجد باين عليه.. جاريدو مش عارف يتعامل مع الإعلام ولا يكسبه.. المهندس إبراهيم محلب مهووس بالإعلام ومش عارف برضه يكسبه.

جاريدو أخباره فى الجرايد سلبية.. والمهندس محلب سلبية.. الجرايد بتقول إن الأهلى بيكمل ويكسب بالبركة.. والجرايد برضه بتقول إن الحكومة ماشية بالبركة.. بدون رؤية أو ابتكار.

جاريدو فى لاعيبة من النادى الأهلى مش مقتنعة بيه، والمهندس محلب الجرايد بتنشر إن فى وزراء من حكومته بيقولوا فى الجلسات الخاصة إنه مش مقنع بالنسبة لهم.

جاريدو لما جه الأهلى الجرايد هاصت ونشرت تقارير من نوعية المخضرم، اللى عنده إنجازات مع فياريال وريال بيتس، والمهندس محلب لما جه رئيس الحكومة، الجرايد هاصت ونشرت تقارير من نوعية الخبرة اللى عنده إنجازات مع المقاولين العرب ووزارة الإسكان.

جاريدو بيكمل بسبب إصرار رئيس النادى الأهلى على أنه الحساب جوه القلعة الحمراء مش بالقطعة وكل واحد لازم ياخد فرصته.. والمهندس ابراهيم محلب بيكمل لأن رئيس الجمهورية ضد الحساب بالقطعة وبيقولنا كل شوية اصبروا.

جاريدو خلاص بيلم حاجاته لأن خلاص ثقة الناس فيه بعد سلسلة الهزايم الأخيرة تلاشت.. المهندس محلب مكمل شوية رغم أن سلسلة الكوراث الأخيرة من فوسفات وقمر صناعى تايه ومية مسمومة وقطارات بتضرب فى بعض ومشروعات غائبة أفقدته ثقة الناس.. هو ده الفرق الوحيد بين جاريدو وإبراهيم محلب.

خلاصة اللى فات: صحيح التقييم بالقطعة ظلم، ضد فكرة المؤسسية، بس فى نفس الوقت اللى ميبصش تحت رجله يبقى محتاج نضاره.. كل واحد من حقه فرصة كاملة.. بس فى جوابات بتبان من عنوانها، وده اللى حصل مع جاريدو ومحلب.. هى واضحة من الأول.. فلما تلاقيها واضحة وضوح الشمس مش عيب ولا حرام إنك تكسر القاعدة.. وتخلى الحساب قطاعى.. بدل ما تبقى الخسارة بالجملة.