تامر شاهين يكتب: يوميات صيدلى فى الأرياف.. سوريا بتضرب بالنووى

صباح الخير عليكو كلكو.. واحد واحد وواحدة واحدة
كفر سندوس البهواية فيها مساجد كتير وفيها جامع واحد كبير بناه عضو مجلس الشعب اللى حياته كلها من بعد ما استوفى شرط السن لغاية ما مات عاشها عضو فى مجلس الشعب.

ومحدش يقوللى دة كان بالكوسة ولا بالتزوير.. الراجل واضح إنه كان مجتهد وشغال فى بلده وخادمهم فى حاجات كتير أوى ومش علشان يعنى كان حزب وطنى ولا كدة ولا كدة.
يا رب سامحنى على الكذب اللى أنا بكذبه ده
الصراحة الجامع دة حلو جدا من برة ومن جوة.. وهو مش بعيد عن الصيدلية.. علشان كده أنا دايما بصلى فيه والنهارده فى صلاة العصر.. قابلت الحاج خليل
- إزيك يا حاج خليل؟
- الحمد لله يا ضاكتور.. نحمده
- قوللى يا عم خليل.. الدكتور حفناوى عامل إيه دلوقتى؟
- والله الحمد لله يا ضاكتور.. عمل عملية وركب فى رجله شريحة ومسمارين والحكما بيقولو أنو لازم يقعد فى المشتشفى أد كده ييجى شهر ولا اتنين
- لا.. ألف سلامة عليه يا حاج خليل، دا أنا أن شاء الله لازم أروح أزوره، هعدى عليك فى يوم كدة ونروح له سوا
- ان شاء الله يا ضاكتور.. فى انتظارك إن شاء الله
أنا فعلا ناوى أزور الدكتور حفناوى فى المستشفى.. زيارة المريض واجبة برضو
خرجت من صلاة العصر ولقيت حاجة جديدة عليا.. أول مرة فى حياتى أشوفها فى حياتى
الشارع على مد البصر مليان عربيات نص نقل حوالى ما يقلش عن خمستاشر ستاشر عربية كدة، وكام عربية نقل جامبو وكمان عربيات كارو بس مش خشب.. لأ.. حديد من اللى بتتجر بالحيوانات وموتوسيكلات كتير أوى من اللى هى الصينى دى.
دة بالنسبة للآلات والماكينات
أما بقا بالنسبة بقا للمنقولات.. دة طلع عفش عروسة يا جماعة.. أو يعنى (العزال) زى ما هو مشهور فى الأرياف.
أما بقا بالنسبة للعنصر البشرى.. تقريبا كل أهل القرية كاملين مكتملين موجودين فى الموكب دة
فى الغالب كمان مفيش حد فى بيتهم دلوقتى.. كله فى نقل العفش
يعنى بمعنى تانى كمية بشر فوق الخيال
أدام الموكب دة كله فيه عربية نقل كبيرة جامبو شايلة الدى جى
وما أدراك بقا ما آل دى جى..
يعنى المهرجانات..
يعنى أوكا وأورتيجا..
يعنى المدفعجية..
يعنى صوت يجيب التايهين
وفوق الدى جى دة راكب شوية شباب فى سن المراهقة أو بمعنى اصح فى سن الاستعباط.. الشباب دول راكبين فوق السماعات وفوق العربية وفوق الكابينة.. نفس المنظر اللى ممكن تشوفه فى المواصلات بتاعة الهند أو بنجلاديش. أو منظر الناس وهى فى مراكب الهجرة غير الشرعية اللى رايحة على إيطاليا.
وتقريبا برضو السماعات بتاعة الدى جى دة والدى جى نفسه مطلعين صهد وحر جامد جدا عليهم.. عشان كدة كلهم قالعين قمصانهم وتى شيرتاتهم وعاملين ستايل عبدة موته كدة.. إلا واحد بس دة قالع القميص والبنطلون، غالبا دة دماغة هربانة منه.

كمية جل فوق شعر الشباب دول تكفى دهان شقة كاملة أوضتين وصالة بالمطبخ بالحمام.
وناس كتير ماشيين جنب العربيات اللى هى اصلا ماشية بالراحة جدا.. الناس دول هما كبرات البلد وأهل العريس وأهل العروسة.

وكمان ستات كتير شايلين على دماغهم الحواية (اللى هى اللفة القماش) وفوقها شايلة اللى ربنا قدرها علىه إذا كان بقا أكل أو طيور أو أى حاجة والسلام.. المهم أنهم يجاملوا.
جو ظريف برضو
وقفت تقريبا تلت ساعة لغاية لما الموكب كله عدى من أدامى وأنا وأقف أدام الجامع.
خلص الموكب الحمد لله..
استنيت دقيقتين كدة لغاية بس ما العاصفة الترابية اللى كانت ماشية وراهم ما هديت. ورحت على الصيدلية.
- بقوللك يا سليمان. أجهز كدة ورانا شوية شغل حلوين
- ماشى يا دكتور
- بص يا سليمان كدة على القطرات وشوف اللى عندنا منها أقل من 3 علب واكتب أساميهم وشوف كدة معاجين السنان والحلاقة فيه حاجة ناقصة ولا كله تمام
- ماشى يا دكتور
- مسا الخير
مسا الخير دى جاية من ناحية الباب.. صوت نسائى زى الكتاب ما بيقول.. أنا بصيت على باب الصيدلية.. لقيت لمبة نيون جوة عباية سمرة واقفة أدام الكاونتر جه فى بالى ساعتها الكذب اللى بتكذبه الحكومة علينا بخصوص أزمة الكهربا
لا يا جماعة مصر مفيهاش ازمة كهربا ولا حاجة.. ما الدنيا منورة أهى.. هى أصلا محطة نووية.. لا دى صاروخ نووى بشرى
- مساء النور يا أفندم.. أؤمرينى
- راح تفهم عليى لو حكيت بالسورى ولا حاول أحكى مصرى؟
الله؟ كمان سورية؟.. الله أكبر.. دة أنا بشوفهم فى التليفزيون بس
- لا يا أفندم اتكلمى سورى زى ما إنتى عاوزة أنا شفت حريم السلطان كله والله وعارف لهجتكم
- هههههه أوكى
أهى أوكى دى لوحدها تحسسك إنك واقف أدام هيلدا فى برنامج ستار اكاديمى
- كنت بالعرس وكان فى كتير إزعاج وصابنى صداع قوى كتير.. بدى دوى دخيلك
- يا سلام.. بس كدة..
رحت جبتلها علبة كيتوفان واديتهولها وقلت لها
- أجيب لك شوية ميه علشان تاخدى الدوا هنا؟
- إى والله يا ريت
- اتفضلى يا مدام الميه
- يسلمو ها الديات.. أنت دكتور صيدلى؟
- آة والمصحف.. دكتور صيدلى
- أها.. حلو كتير.. بتعرف دكتور؟.. أنا طول نهارى بشتغل بالماى فعم تعمل لى مشاكل بيدى مثل الاكزيما.. شو فى علاج لها الشى ؟
- ورينى كدة
فى نفس اللحظة إلى الست دى بتحاول تخلينى أشوف الاكزيما فى أيديها.. تدخل عهد الصيدلية
عارفين مين عهد؟
عهد دى خطيبتى
لو كنتو مكانى وبصيتو فى عيون عهد اللى وقفت متسمرة على باب الصيدلية وشوفتو كمان حاجبها الشمال اللى مرفوع شويتين وإيديها اللى ربعت أدامها كنتوا عرفتوا ليه انا معرفتش ابلع ريقى
فاكرين فى أول الحلقة دى لما قلتلكو إنى هروح للدكتور حفناوى بصفتى زائر
تقريبا كدة والعلم عند الله انى هروح له بصفتى مقيم
استر يارب
اشوفكو فى الحلقة الجاية أن شاء الله . .بس لو عهد سابتنى أعيش
دمتم بخير
سلامو عليكو