نصر فتحى اللوزى يكتب: أنا اتنشلت

قال ابن حنفى اطمن ياغلبان
طرحنا لك من اللحوم أطنان
ايش فراخ وبط ووز وسمان
لحمة عجالى ومعيز وخرفان
وسمك بورى بلطى ومرجان
وطماطم خرجت من مرستان
وبطاطس وفاصوليا وبازنجان
وبامية رجعتلكم من التوهان
وكرنب لمحشى بلحمة الضان
كله لك رخيص بأسعار زمان
شايلاه منافذ متنقلة ياجدعان
فى كل حارة يحاربوا الطمعان
قلت يالوزى أنت بقيت سلطان
***
فى السوق على جيوبى لطمت
الجنيه فى جيبى تايه أنا دمعت
أسعار نار الكوسة بترقص تت
حتى أنت بقالك قيمة ياسى لفت
حسب وعود الوزير أنا ماشفت
لفيت كتير عن فرخة بيضا سألت
سعرها خلانى أمد إيدى استلفت
ياناس مفيش رقابة أنا صرخت
قالوا زماننا خلى اللى فوق تحت
إلا الأسعار فى العالى ياواد يافت
فين المنافذ والأسعار بقت زفت
بشنطتى فاضية لبيتى أنا رجعت
سألونى بحزنهم قلت أنا اتسرقت
***
صحيح أنا اتنشلت بتصريح الوزير
زى العجوز لما زرع تحت السرير
قال ارجع شباب من حزمة جرجير
طلع النهار نايم متأنفد على حصير
معلمه فى جنابه كضرب السواطير


يقولوا تصريحات زى الزبدة وكتير
فى السوق تسيح والفلوس عصافير
الرحمة مالهاش مكان عند المناشير
تجار لا خوف من حساب يوم عسير
ياناس خافوا من دعوة محروم فقير
بيحلم بالشوربة تدفيه فى يوم مطير
***
ياخلوده دا احنا كلنا ولاد أمنا مصر
ابن المدينة زى القروى فى كل كفر
التوزيع يبقى على الجميع بلا غدر
الخير لازم يعمنا كلنا زى مية النهر
مش ناس هايصة وناس ميتة بالفقر
لو كان الفقر رجلا لحرقناه بعد النحر
المعاش يوم مولده مات اول كل شهر
الصبر زهق مننا اكل مننا زى الدهر
حسبى الله كلمتان ليس لنا منهما مفر
يا راحم الغلابة يرحمك الله من كل شر
كن عدلا للبطون تكون الجنة لك مهر