د. إبراهيم ناجى يكتب: جايلك زيارة.. قوم سَفلِت

عندى سؤال لأى مسئول فى البلد اللى أحنا عايشين فيها دى.. هو لو حد حكالك عن واحد شغال جديد فى قهوة وأول ما استلم شغله لاحظ أن إيرادها قليل جدا، وأنها محتاجة صيانات كتير وطبعا ده نتيجة لسوء إدارة القهوة دى قبل ما حضرته يشتغل فيها وبالتالى أصبحت القهوة لامؤاخذة مقلب زبالة ومبقاش فى زباين بتيجى وبالتالى الإيراد قل، وجه صاحب القهوة قال لصاحبنا أنا هديك فلوس تجدد القهوة وتشغلها.. تخيل بقى حضرتك لو صاحبنا كان كل همه يعرف صاحب القهوة هييجى أمتى يشوف التجديدات وبدل ما يشيل الزبالة ويجدد الترابيزات ويحسن الخدمة راح رايح دافع كل الفلوس اللى معاه فى تجميل الطريق من أول بيت صاحب القهوة لحد القهوة وراح مجدد الترابيزة اللى هيقعد عليها وشكرا على قد كده.. حضرتك كمسئول تحلل التصرف ده إزاى؟.

أنا أقولك الاختيارات، إما أن المدير ده إنسان فاشل ومعندوش أصلا آلية حل للمشكلة فبيضحك على عقل صاحب القهوة، أو أنه إنسان مش أمين وصرف الفلوس على حاجات غلط أو أخدها لنفسه وبيغطى نقص الفلوس بإبهار صاحب القهوة، والحل الأخير أنه مش فاهم حاجة فى حاجة والناس اللى شغالين معاه أقنعوه أن ده أفيدله فى حين أن ده أفيد ليهم هما عشان كل حاجة تفضل زى ما هى واللى بيطلع مصالح يفضل يطلع واللى بيسرق يسرق وكل من ليه استفادة من انعدام الرقابة يفضل مستريح.

أيا كان الاختيار من التلاتة ففى النهاية القهوة مستفدتش حاجة والزباين برده مش هتيجى والإيراد مش هيزيد وصاحب القهوة كل اللى عاد عليه أنه دفع فلوس زيادة من إيراده اللى هو أصلا قليل عشان يتدلع شوية يوم الزيارة.

عزيزى محافظ الغربية الجديد.. فى احتفالات أعياد أخوتنا المسيحيين هذا العام تم رصف نصف شارع المتوكل فى مدينة طنطا المؤدى للكاتدرائية فقط حيث كنت ستمر معاليك وحضرة الأنبا بولا ولم تكلف هيئة الطرق نفسها حتى أن تكمل باقى الشارع بعد الكاتدرائية أو أن تقوم برصف شارع حسان بن ثابت الذى يبعد مترات قليلة عن موقع الزيارة بالرغم من أن شارع حسان هو أهم شارع تجارى فى مدينة طنطا ورصفه تهالك منذ أعوام وأصبح يشكل كابوسا لكل قائدى السيارات وسببا دائما للازدحام المرورى وتكسوه مياه المجارى يوما بعد يوم.. سؤالى لحضرتك يا ترى يومها عجبك لون الرصيف ولا نغيره المرة الجايه؟!! عزيزى المسئول على رأى عادل إمام "اللهم أخرب بيتنا أحنا يا شيخ ..".