محمد عطية العبد يكتب: القدوة راحت يا جدعان

أنا وكل أبناء جيلى أول ما وعينا على الدنيا وجدنا التليفزيون بيعرض مسلسل (الأيام) عن قصة حياة وكفاح الدكتور طه حسين وعدم استسلامه للإعاقة التى ألمت به واللى من الممكن أنها تمنع أى حد اليومين دول من إنه يتعلم ويوصل لأعلى المنازل. وأيامها التليفزيون كمان كان يعرض المسلسلات المليئة بكل المعانى والقيم الأسرية الجميلة (مسلسلات حسن عابدين) التى تربى عليها أجيال وأجيال عرفت معنى التسامح والمودة والشهامة والكفاح فى الحياة وعدم الاستسلام للظروف.

وكنا نلاقى فى نهاية أى مسلسل أو فيلم الظالم ياخد جزاءه ولازم الحق والخير ينتصر فى النهاية. كبرنا وكل هذه القيم أصبحت جزءا من التكوين الفكرى والنفسى عندنا.

والحمد لله الذى لا يحمد على مكروه سواه ربنا سبحانه وتعالى ماحبش يحرمنا من إننا نشوف القدوة والمثل يتغير ويبقى (عبده موته) و(فارس قلب الأسد) وباقى شلة ممثلى البلطجة فى السينما المصرية وجملهم وكلامهم المنتشرة بين الشباب والأخطر الأطفال ويصبح أفعال وتصرفات نجوم أفلام هذه الأيام هى النموذج اللى الشاب ماشى عليه زى المسطرة.

بل أصبحت جمل وأفيهات هذه الأفلام هى العناوين الرئيسية لكل خلفيات وأماميات التوك التوك والميكروباص، مع صورة للبطل عشان أنت كمواطن تعيش اللحظة وتعرف أد إيه البطل ده كان بيتعذب عشان يوصللك المعلومات القيمة دى وأد إيه سهر ليالى فى تعب واجتهاد مش فى حاجة وحشة لا سمح الله – أوعى ظنك يروح لبعيد – ولكن للخروج بمثل هذه الحكم والمواعظ والتى تعتبر خلاصة العرق والكفاح.

والغريب أن النقاد أو حتى الجمهور العادى البسيط لو انتقد الانحدار والانحلال اللفظى والخلقى داخل أى عمل فنى تجد المؤلفين يردوا بالإجابة الخالدة (إحنا بنعبر عن البسطاء والمهمشين فى المجتمع – وإحنا ليه زى النعام عايزين نحط رأسنا فى الرمل ومانواجهش المشاكل.. الخ) من الكلام العميق الجميل المؤثر اللى يحسسك أنك أنت المقصر إزاى ياخى مش واخد بالك من المشاكل اللى حواليك.

الغريب بقى أنك ساعات تلاقى العكس تماما فيلم أو مسلسل بيحكى عن قصص الحب والصراعات الأسرية العميقة والمؤثرة داخل مجتمع الأغنياء ورجال الأعمال الذين لا هم غير افتقادهم للحب الحقيقى فى حياتهم وفتور علاقة الزوج بزوجته بعد 50 سنة جواز وإنها مش فاهماه كويس بعد ما بقى عندهم أحفاد، سبحان الله قادر على كل شىء.

نداء إلى كل الكتاب والمؤلفين يا جماعة هى الوسطية راحت حتى فى الفن مفيش حد شايف الناس اللى فى الطبقة المتوسطة واللى برده جزء من المجتمع ولا هو المجتمع اللى لازم نشوفه على الشاشة يا فوق خالص يا تحت خالص.