وإلى نص التحقيقات:-
س: ما قولك فيما هو منسوب إليك من أنك متهم بخطف المجنى عليها "فاطمة. أ" وكان ذلك عن طريق التحايل بأن اصطحبتها بمسكنك بعيدا عن رقابة زويها قاصدا من ذلك خطفها، وقد اقترنت تلك الجناية بجناية أخرى تلتها بقصد تسهيل ارتكابها وهى مواقعة المجنى عليها بغير رضائها بالاشتراك مع آخر؟
ج: محصلش .
س: ما الذى حدث إذن وما هى ظروف ضبطك وإحضارك؟
المتهم: البنت قالت عندى مشاكل مع أهلى وليس لى مكان للمبيت به.
ج: اللى حصل إن يوم السبت كنت بفضى جامع السيدة نفيسة من الناس اللى موجودة فيه، وساعتها لقيت البنت اللى اسمها فاطمة بتقولى إنها عندها مشاكل مع أهلها وعايزه تبات فى الجامع، علشان مفيش مكان تبات فيه، وسألتنى لو واحد مسيحى عايز يتجوز واحدة مسلمة يعمل أيه، وأنا رديت عليها إنى مش إمام الجامع، وأنها تسأل دار الإفتاء أو الأزهر، ولقيتها ساعتها قعدت تعيط، فرحت لزميلى عصام وحكيت له الحكاية ساعتها، فقالى مشيها من الجامع ومتخليهاش تقعد فأنا قمت ساعتها مديها مصحف من الجامع، وقلت لها تخرج من الجامع، واديتها مفتاح العربية بتاعتى وقلت تقعد فى العربية والتليفون فيها تكلم حد من عيلتها، وأنا قمت بالشغل بتاعى فى الجامع لغاية ما خلصت بعد صلاة الفجر، فخرجت لقيتها لسه موجودة فى العربية وساعتها كانت حوالى الساعة 5 صباحا يوم الأحد 19/5/2014 وساعتها وقفت تاكسى علشان هى كانت اقتنعت إنها تروح، وأنا ساعتها اديت سواق التاكسى فلوس وأنه لو بقى فلوس يديها لها، وركبت هى التاكسى وروحت أنا بيتى علشان أنام، وبعدين صحيت من النوم على تليفون وكيل وزارة الأوقاف، وقالى تعالى بسرعة فأنا نزلت وعديت على عصام زميلى، ورحنا على مديرية أوقاف القاهرة، ولقينا والدها واقف ومعاه اتنين أمناء شرطة، وأخدونى أنا وعصام فى عربيتى، وطلعنا على العمرانية وأبوها ساعتها قالى إنت معمولك ضبط وإحضار فى العمرانية، ورحنا على قسم العمرانية لحد ما اتعرضنا على نيابة العمرانية، وبعد كده طلعونا على قسم الجمالية، وبعدين أخدونا على قسم الخليفة وجبونا النهاردة على النيابة وهو ده كل اللى حصل .
س: ما هو طبيعة الحوار الذى دار بينك وبينها آنذاك؟
ج: هى حكيتلى إنها على خلاف مع أهلها وإنها مش عايزه تبيت فى بيتها وطلبت منى إنها تبات فى الجامع.
المتهم: البنت طلبت المبيت فى الجامع فرفضت
س: وما الذى بدر منك آنذاك؟
ج: أنا قلت لها ممنوع إنها تبيت فى الجامع علشان فيه صندوق النذور فى الجامع، وإنه ممنوع أى حد يبيت فى الجامع ورحت لعصام زميلى وحكتله الحكاية، وهو قالى مشيها فأنا قلت ليها كده لقيتها قامت عيطت، فأنا اديتها مفتاح عربيتى وقلت لها تخرج تقعد فيها لغاية ما أخلص شغلى علشان هى تروح بعد كده، وفعلا هى خرجت قعدت فى العربية لحد ما أنا خلصت شغلى، وساعتها خرجت وقفت لها تاكسى، واديته الأجرة بعد ما أقنعتها إنها تروح لبيت أهلها، وقلت لسواق التاكسى لو اتبقى فلوس يديها لها وسمعتها ساعتها بتقوله ودينى الملك الصالح وأنا قمت مروح لبيتى.
*الموضوعات المتعلقة..
- تحقيقات النيابة فى اغتصاب فتاة مسجد السيدة نفيسة.. فاطمة: كاتب النذور وصاحبه: شربونى إزازة "ID"على إنها حاجة ساقعة وخدونى الشقة.. فوقت لقيتنى فى السرير وهما قالولى:استحمى علشان تبقى طاهرة
