نصر فتحى اللوزى يكتب: نقط دمك نار يا شهيد

فى ليلة ميلادك شفت نور جاى من بعيد
وفى الصبح قالولى مبروك علينا بالوليد
أبوك قال والله هل علينا الخير من جديد
أنا قلت هسميه سعيد
أختك قالت سموه وحيد
أبوك قال هسميه شهيد
***
وكبرت قدام عنيه يا غالى
قلت أنت هتبقى عكازى وراسمالى
شايلاك للزمن تشيل عنى هم أحوالى
أنت كحل عيونى ومنى القلب طوالى
اشتد عودك ورجليك شايلاك بالحب فى العالى
ياريت سميتك يا حبيبى معالى
***
أخوك الكبير بقى عطر الرمل فى سينا
وكتبوا اسمه على شارع فى المدينة
باروح البندر أشوف اسمه وأنا مش حزينة
أبوك فرحان وقالى مبروك الشهيد علينا
دا أحلى نور بنشوفه بعنينا
واقف على باب الجنة بالشوق ينادينا
***
كبرت ياحتة منى وناداك الجيش للواجب
أنا قلبى اتخض عليك وانت الننى والحاجب
قلت أخوه سبقه والشرف لنا صاحب
أبوك قال ادعيله يعلى بمصر فوق كل المصايب
فى ليلة شفتك لابس أبيض والبياض غالب
وقلتلى أوعى تزعلى أنا مع الحبايب
***
صحيت من النوم على صوت أبوك
بيقول نقط دمك نار يا شهيد على اللى قتلوك
ناديتك بروحى وقلت للجنة توجوك
أنت على راسى كرامة زى تاج أخوك
ملايكة الرحمن بالمسك غسلوك
وللجنة يا نور عينى الملايكة زفوك
***
ندر عليا هقدم لمصر أخوك مخلص
نحميها من كل عدو متربص
قدام حبنا لبلدنا كل شئ يرخص
نحميها بأرواحنا وأجسادنا بدءا من الأخمص
نسلمها لأحفادنا بكرامة والخير تحت رجليهم يرقص
تاريخنا بيقول إحنا صناع المجد وغيرنا يقرأ ويتفحص
***
يا وليدى ياشهيدى اطمن مفيش عن النصر رجوع
مفيش خنوع
مفيش خضوع
إحنا فى محراب حب مصر كلنا لها خشوع
ممسوح من قاموس مصرنا كلمة ركوع
عيوننا متعرفش ابدا للنصر يعنى ايه دموع
***