ننشر اعترافات المتهمة بقتل زوجها ودفن جثته أسفل السرير بالجيزة.. الزوجة: حاول إجبارى على ممارسات جنسية محرمة فرفضت وقاومته فسقط على الأرض.. وأبلغت ابن عم زوجى قبل هروبى مع عشيقى.. وتؤكد: "مكنش قصدى"

"أنا مكنش فى بالى اقتله، كل اللى حصل إن يوم الخميس بيحصل لقاء حميمى بينى وبين زوجى كالعادة، هو كان شارب (حشيش) ودماغه تقيلة، فوجئت بيه بيطلب منى أمارس معاه حاجة حرام، قولتله مش هينفع كدا، أنا مبحبش الكلام دا، لكن هو أصر على فعله، مرة واحدة وأنا بقاومه وقعت أنا وهو على الأرض، ولاقيته مسك صدره وبيقولى أنا تعبان، مكنش قادر ياخد نفسه، وفجأة لقيته قطع الكلام وعينه قفلت، ساعتها مكنتش عارفه أعمل إيه ولا أتصرف إزاى، كنت خايفة أوى، ولادى التلاتة صغيرين وكانوا نايمين ساعتها، ملقتش قدامى غير إنى أكلم (م.ا) دا واحد كنت عارفاه على جوزى من فترة، اتصلت عليه وقولتله الحقنى أنا فى مصيبة ومش عارفة اتصرف، وخلال ربع ساعة كان وصل، واتفقنا على الهروب عشان كنت خايفة يتهمونى بقتل جوزى، وقبل ما نهرب حملنا الجثة ولفناها بملايه، وخبناها تحت السرير".

وأضافت المتهمة بقتل زوجها بمنطقة إمبابة خلال اعترافها بارتكاب الجريمة: "عشيقى عرض عليا السفر للسويس، عشان له قرايب هناك وهنستخبى عندهم، وقبل ما اهرب بعت رسالة لابن عم جوزى قولتله فيها اللى حصل، وعرفته مكان الجثة، ورحت وعشيقى للسويس، لحد ما لاقينا ضباط المباحث بيقبضوا علينا".

وتابعت المتهمة اعترفاتها قائلة: "أنا مكنش قصدى أقتله، لما دفعته وقع على الأرض وأنا وقعت فوقه، بس هو مقدرش يتنفس ومات، أنا خايفه على ولادى هيضيعوا من بعدى ونفسى أشوفهم عشان يسامحونى".

تلك الاعترافات جاءت على لسان المتهمة بقتل زوجها والاشتراك مع عشيقها فى إخفاء جثته بإمبابة، حيث تم الكشف عن الجريمة ببلاغ تلقاه العميد محمد عبد التواب، رئيس مباحث قطاع شمال الجيزة، من عامل أفاد فيه بعثوره على جثة شقيقه داخل شقته بإمبابة، وبالانتقال إلى محل الواقعة عثر العقيد إيهاب شلبى، مفتش مباحث شمال الجيزة، على جثة المجنى عليه بغرفة نومه بها آثار تورم بالوجه ونزيف من الفم والأنف ولم يتم العثور على أى آثار طعنات أو إصابت بجسده.

وتوصلت التحريات إلى أن المجنى عليه صاحب محل متزوج ولديه 3 أطفال، وأن زوجته متغيبة عن المنزل، وذكر شقيق الضحية أنه تلقى اتصالا من ابن عمه أخبره أن زوجة المجنى عليه أرسلت له رسالة تخبره بوفاة شقيقه، وأنه حضر إلى الشقة وعثر على جثته أسفل السرير.
وبتكثيف التحريات تبين أن الزوجة وراء ارتكاب الجريمة وأنها ارتكبت الواقعة وفرت هاربة، حيث تبين أنها ترتبط بعلاقة عاطفية بعامل وأنها هربت بصحبته إلى محافظة السويس.

وبالتنسيق مع مديرية أمن السويس تمكن المقدم محمد أمين، رئيس مباحث قسم شرطة إمبابة، والرائد هيثم سكر، رئيس نقطة المنيرة الغربية، من ضبط المتهمة وعشيقها، وبمواجهتها اعترفت بارتكاب الواقعة وذكرت أن زوجها حاول القيام بممارسات جنسية محرمة معها إلا أنها رفضت وقاومته وأثناء ذلك دفعته فسقط أرضا ثم فارق الحياة.

وذكر عشيقها أنه ساعدها فى إخفاء الجثة أسفل السرير فقط ولم يشارك فى قتل زوجها، كما أنه ساعدها على الهرب لدى أقاربه بمحافظة السويس، فتم تحرير محضر بالواقعة وإحالتهما إلى النيابة للتحقيق.