"حروف الضعف".. قصيدة جديدة لـ"إكرام عيد"

1
ومسكت بخيوط الألم
أغزل على نول الوجع
قصة فرح
وأما انجرح عمرى
وسرسب من شقوق الروح
غنا مجروح
كملت الطريق مرغم
ومليت سكون الكون ضجيج
2
رغيف العيش
الموجوع بيجوع
لشوية نور
رغيف متغمس
حبة صبر
فى نهاية السطر
المتلون بنهار مجنون
متحوج بالأحلام
على طاولة يومى المركون
3
مفتاح اللمبة المدارى
ورا باب الشقة المقفول
بيبص على البلكونة حزين
والليل المتوضى بحزنه
بيصلى
على باب الجرح المتوارب
مضفر بحروف الضعف
مغزول
مع صمت الكلمة
المتحنية أنين
وحنين بيعاكس
أحلامى
فى غابات الخوف
لما بشوف
النور المطفى
فى قلب البحر
بسافر لهناك
وهناك الروح بتغنى
غنوة صمت
على وتر العمر المجروح
4
الحمامة
اللى طايرة
وسط موجة غدر
مش عايزة تعترف
بالانكسار
رافضة الحوار
مع شمس
لسه بتتولد
على باب سكوتى
عدت حدودى المستفزة
للجميع
أما الربيع
اللى فى عيونها انطفى
فوق شط خوفى
وما بين عيون الضعف
بلت غنوتى