اعترافات المتهم بقتل زوجة خاله بالإسكندرية: "شتمت" أهلى الموتى وهذا من الكبائر.. "طلبت 5 آلاف جنيه "سلفة" فرمت 400 جنيه فى وشى وصعبت عليا نفسى".. 6 أشخاص فى رقبتى وكنت محتاج الفلوس ومفيش صاحب هيسلفنى

"لو القتل من الكبائر فسب الأموات برضه من الكبائر ولو هى أختى مش مرات خالى، وسبت أخويا وخالى الميتين كنت قتلتها برضه، وصحيح أنا سرقت فلوسها لكن ممدتش أيدى على الفلوس اللى رمتهم فى وشى لأن عندى كرامة"، كانت هذه جزء من اعترافات المتهم الأزهرى، الذى لم تمنعه علوم الدين الذى درسها أثناء دراسته بمدارس الأزهر حتى الصف الثالث الإعدادى، من ارتكاب أكبر الكبائر وهى قتل النفس بغير حق، بل وكانت ضحيته زوجه خاله التى آوته فى منزلها لسنوات بعد وفاة والديه.


التفاصيل يحكيها " عبد التواب .ح" وشهرته "رجب " – 28 سنة عامل ومقيم بمنطقة كوم الشقافة بالإسكندرية، والتى نجحت مباحث قسم شرطة مينا البصل برئاسة المقدم وائل الحيوى، وإشراف اللواء نادر جنيدى مدير أمن الإسكندرية، فى القاء القبض عليه بعد ساعات قليلة من اكتشاف جثمان الضحية داخل شقتها بعد غيابها عن الجيران ليومين.

يقول رجب:"أنا كنت بشتغل فى مطعم كبدة وبكسب فى اليوم من 70 إلى 80 جنيه وكانوا بالنسبة لى رضا وحاولت أفتح مشروع لوحدى عبارة عن مطعم خاص بى لكن فشل وأصبحت مديون بمبلغ 20 ألف جنيه كنت ناوى أسددهم من يوميتى لكن أخويا توفى من شهر ونص وساب فى رقبتى 5 أطفال وأمهم ده غير خالتى المسنة، وأصبحت العيشة صعبة وضنك".

ويكمل رجب اعترافاته:" كنت عايش مع مرات خالى من وأنا صغير أنا وإخواتى بعد ما أهلى توفوا لكن بمجرد وفاة خالى اتغيرت معاملتها لنا وقررت أسيبلها الشقة وأسكن مع خالتى وكنا بنروح ليها من وقت للتانى وعلشان كان لها معاش من خالى، وكنت عارف إنها بتحوش فلوس علشان تعمل عمرة، طلبت منها إنها تسلفنى فلوس أسدد بها ديونى وأصرف على ولاد أخويا".

ويتابع المتهم قائلاً:"حت لها الشقة وطلبت منها 5 آلاف جنيه فبدأت تصرخ فيا وتسب فى أخى وخالى المتوفيان وتقول "مخدتش من أهلك غير الهم والسواد ربنا يعذبهم فى الأخرة زى ما عذبونى فى الدنيا"، كنت بقولها حرام تشتمى الأموات علشان ربنا أمرنا بذكر محاسنهم لكنها فضلت تشتم فيهم وبعدها دخلت غرفتها و لقيتها بترميلى 400 جنيه فى وجهى وتقول "هما دول اللى عندى".

ويكمل المتهم تفاصيل ارتكابه الواقعة :"صعبت عليا نفسى أوى إنها ترمى الفلوس فى وشى وكمان تشتم أهلى اللى ماتو والشيطان سيطر عليا ودخلت المطبخ أخدت السكينه و طعنتها فى بطنها مرتين ولقيتها لسه فيها الروح فذبحتها من رقبتها، ودخلت أوضتها وأخدت الفلوس الموجودة فى الدولاب وكانت 10 آلاف جنيه وطبعاً ما أخدتش الفلوس اللى رمتها فى وشى عشان كرامتى مسمحتليش بده".

ويتابع المتهم:"مكنش فى طريقة تانية اسدد بها ديونى وأصرف على ولاد أخي غيرها وكنت بشتغل 12 ساعة و عنديش حاجة أبيعها علشان عايش فى أوضة مفيهاش تليفزيون حتى، ومعنديش صاحب يسلفنى 5 آلاف جنيه والجمعيات الخيرية تعطى أموالها فقط لمن يعرفوه فالحل كان قتلها علشان الفلوس وعلشان أخلص باقى أخواتى من طبعها السئ وانتقم لأهلى اللى شتمتهم فى تربتهم".

ويضيف رجب :"أنا مش ندمان إنى قتلتها لأنها كانت مؤذية وقاسية علينا ومحدش بيبكى على اللى طبعه وحش وأنا مش هبكى عليها أنا بس خايف على ولاد أخويا".

كانت مباحث مديرية أمن الإسكندرية برئاسة اللواء شريف عبد الحميد، مدير إدارة البحث الجنائى، تلقت بلاغاً من العميد ياسر عبد المحسن مأمور قسم شرطة مينا البصل، يفيد قيام أهالى منطقة كوم الملح بالإبلاغ عن العثور على جثة مسنة "خيرية .ح " – 60 سنة داخل مسكنها بعد انتشار رائحة كريهة.

وأمر اللواء نادر الجنيدى مدير أمن الإسكندرية، بوضع خطة بحث أشرف عليها العميد محمد هندى رئيس المباحث و فى خلال 4 ساعات من اكتشاف الجريمة نجح ضباط مباحث القسم فى الوصول إلى مرتكب الواقعة.


وعقب تقنين الإجراءات، تم ضبط المتهم وبمواجهته اعترف بارتكابه الواقعة وأنه عقد النية على سرقة المجنى عليها لسابقة علمه باحتفاظها بمبالغ مالية بمنزلها حيث أنه كان يمر بضائق مالية فقام بإخفاء سكين بين طيات ملابسه وصعد إلى المجنى عليها التى كانت تربطهم علاقة قرابة، فقام بطرق باب الشقة ففتحت له ثم قام بطلب مبلغ مالى ولكنها رفضت فطعنها عدة طعنات حتى فارقت الحياة وقام بالاستيلاء على مبلغ مالى وقدره 10 الاف و840 جنيه ثم تخلص من السكين بالقاءه بترعة المحمودية، تم ضبط المبلغ المالى المسروق وإرشاد المتهم، وتم التحفظ على المتهم والمسروقات.