"مراهق" يهتك عرض "طالبة" أمام مدرسة بالساحل.. والدة المجنى عليها: "الولد هوايته يمسك صدر البنات أمام المدرسة.. واختار بنتى من وسط زمايلها لإن جسمها أكبر من سنها".. والمحكمة تقضى بحبسه 3 سنوات

حالة من الهوس بفتيات المدارس سيطرت على أحد المراهقين بمنطقة الساحل، إضافة إلى غياب عملية التربية والتنشئة دفعت "على.ن"، 15 سنه، عاطل، بالتحرش بـ"ب.ن"، طالبة، وهتك عرضها عقب خروجها من مدرستها بالساحل.

وروت "ك.أ"، والدة المجنى عليها، تفاصيل الواقعة فى تحقيقات نيابة الساحل المقيدة برقم 3221 لسنة 2015 جنايات الساحل، حيث قالت "اللى حصل إن بنتى "ب" 14 سنه، لقيتها راجعه من المدرسة ولونها مخطوف وفى حالى توتر غريبة، متعودتش أشوفها بالشكل ده قبل كده، وساعتها دخلت أوضتها على طول من غير حتى ما تكلمنى أو تسلم عليا زى ما عودتنى، قمت داخله وراها أوضتها وأول ما شافتنى إنهارت من العياط، روحت واخداها فى حضنى وسألتها على اللى حصل" .

وأضافت والدة المجنى عليها: " بنتى قالتلى إنها بمجرد خروجها من المدرسة وهى راجعه على البيت مع زمايلها فى ولد من اللى بيوقفوا بره المدرسة عشان يعاكسوا الطالبات، قرب منهم وهما ماشيين فى حالهم راح ماسكها من صدرها، قامت مصرخه هى والبنات وهو قدر يجرى منهم لإنهم إنشغلوا بالبنت وهى بتصرخ، وهما إفتكروه مجنون وخدوا بعضهم ومشيوا " .

وتابعت: "لكن الولد رجعلهم من ورا وراح ماسكه البنت من صدرها مرة تانية وشدها جامد، وخد بعضه وجرى، والبنت إنهارت من العياط، وأنا مش فاهمه هو ده ذنب بنتى لإن جسمها فاير عن بقية زمايلها؟ ".


وقالت والدة المجنى عليها: "قمت واخده بعضى ومحرره محضر فى القسم بالواقعة، ولإنى عارفه إن المحضر مش هيجيب نتيجة ومش هيجبلى حق بنتى، رحت واخده 3 ستات من جيرانى وحكتلهم اللى حصل، وروحنا المدرسة تانى يوم ومعانا بنتى، واللى توقعته حصل الولد كان موجود هناك لإن تقريباَ موضوع مسك صدر البنات ده كان هوايته، وأول ما البنت شافته من بعيد شاورتلى عليه وقالتلى هو ده يا ماما، قمت رايحه فى هدوء أنا وجاراتى الثلاثة اللى كانوا معايا، وقمت مسكاه أنا والنسوان" .

وأضافت:"قاموا قلعين الشباشب اللى فى رجلهم وإديناه علقة مايخدهاش حرامى فى مولد، وكل اللى رايح واللى جاى من أدام المدرسة أول ما يعرف الحكاية يقوم قالع اللى فى رجله ويديله بيه، وبعد كده أصحاب المحلات اللى حوالين المدرسة خدوه مننا وفضلوا حاجزينه عندهم لغية ما الشرطة جت خدته" .

من جانبها، قررت محكمة مستأنف جنايات أحداث القاهرة، برئاسة المستشار طارق دره، وعضوية المستشارين محمود شرف الدين، ورامى عامر، وأمانة سر محمد فتحى، حبس المتهم 3 سنوات، لإتهامه بهتك وعرض الطالبة بالساحل.