قصيدة "أصحاب الشك" للشاعر أحمد مصطفى عبد الحى

كل اللى عدى من كلام عدى..
كلامهم مر ف الأبيض..فضل أبيض..
كل اللى نولته م السؤال والرد..
زى ما تنول الأيادى..م الدب ف الخرسان..
فجأة لقيتنى الشاعر الخسران..
ولقيتنى مقسوم لاربعة..
كلٌ عيونه مربعة..ماتشوفش غير البحر..
كلٌ بنفس الغضب..
كلٌ بذات الشبه..
لو كان ضرورى من وجود معنى..
فلابد من مجذوب واقف بيسمعنا..
يدرك تمام عقله..
وإن الجميع مجانين..
ولابد من إنسان..
على حافة الإنسان..
يرجع لأصل الطين..
ولابد من شاعر يبروز المأساة..
يشحن خياله بوجود..
العدل فى مجراه..
ولابد من صاحب..
تايه فى نفس الدرب..
فى لحظة ينسى الحوت..
ولابد من أطفال..
يتغنوا وسط الحرب..
بروعة الملكوت..
ولابد منها..
ومنها..
منها بييجى الصوت..
أما عن المجذوب..
آمن وطن مكذوب..
كان كل شىء بيدوب..
رد فى ساعة تجلى..
لو وقفت العربات تحيّى..
صفوف مجاذيبك الغاضبة..
وكأنهم فرسان قدام..
خارجين يادوبك م الزمن..
وإن العصاية والتراب والخيش..
خوز وسيوف ورايات لجيش..
ممكن ساعتها أصدقك..
ممكن أعيش الملحمة..
أما عن الإنسان..
فماعدش فى الإمكان..
غير يستمر السير..
زى الحياة ما تقول..
زى الحياة ما تؤول..
من غير لجام رادع..
من غير ضمير وازع..
من غير سؤال واسع..
يكشف حدود الغير..
أما عن الشاعر..
واقف هنا شاعر..
بطل كتابة الشعر..
دبح ذهنه أمام الخلق..
ودبح الخلق فى ذهنه..
وماكنش أب رحيم..
وماكنش ذبح عظيم..
يفتدى بيه القصيدة..
واقف هنا شاعر..
فى صفوة المجاذيب..
غريب كأنه الصدق..
فى زحمة الأكاذيب..
كتب فى مرة "القاهرة"..
ردّوا وراه "الثائرة"..
صلح غلطهم "عاهرة"..
ردّوا عليه العمل..
ونفوه ف قلب الذاكرة..
واقف هنا شاعر بطل كتابة الشعر..
وأول مرة يا سادة..
ساحر قلب ع السحر..
أما عن الصاحب..
فماعدش فيه أسباب..
تملى فراغ الغياب..
أما عن الأطفال..
شوفتهم بوشوش صفيح..
شوفتهم بعيون صفيح..
جوه منها سؤال فصيح..
عن مدى ضيق الحياة..
عن كدبة الكون الفسيح..
وأما عنها..
هى اللى ممكن ينفرد صوت سلالم..
علشان تطول النجمة فى سكتى..
هى اللى فى حضنها ممكن أسالم..
جميع شعوب الأرض..
أقلع وحدتي..
هكذا قال الشاعر الأول..
وعن غايب..فى ليل الغربة بيطول..
لكن ما يمنعناش نغنى..
ونغنى..
لكن..ما بنغنيش عن الغربة..
ونقول عن الوطن البعيد كدبة..
ونقول عن الخل الوفى معذور..
ونشوف سواد الشك ليل بَهتان..
ونشوف سواد الجهل م البُهتان..
وأكيد يجوز الصدق..
فى شريعة الإنسان..
برغم إن الأكيد كدبة..
ونغنى لكن..مانغنيش عن الغربة..