ننشر إعترافات المتهم بذبح حبيبته بعد 4 سنوات عشق بأطفيح: "طلبت من أبويا يخطب لى "سمارة" لكن رفض وقالى انسى.. هددتنى بكشف العلاقة خفت خطوبتى "تتفسخ" وقررت اقتلها.. استدرجتها لأرض زراعية وطعنتها"

شهدت منطقة أطفيح بجنوب محافظة الجيزه جريمة قتل بشعة راحت ضحيتها فتاة تبلغ من العمر 24 عاما بعدما تخلص منها حبيبها لإصراراها على الارتباط به وعجزها عن نسيان أمره عقب ارتباطه بفتاة أخرى غيرها، إلا أن الحب فى تلك الجريمة كان الدافع وراء قتل الحبيبة

الحبيب الذى يصغر المجنى عليها بعامين قرر استكمال مشوار حياته بعد رفض اسرته الارتباط بحبيبته وخطب فتاة أخرى غيرها، ومع مطاردة حبيبته السابقة له استدرجها لمنطقة زراعية وذبحها وترك جثتها عائدا إلى بيته حتى تم القبض عليه وبحوزته سلاح الجريمة والهاتف المحمول الخاص بالمجنى عليها.
"مصطفى.م" البالغ من العمر 22 عاما إعترف عقب القبض عليه بتفاصيل إرتكابه الجريمة قائلا "انا كنت بحب "سمارة" جدا، وهى كمان كانت بتحبنى، وكنت واعدها ان قصة الحب اللى بينا لازم تنتهى بالجواز زى أى علاقة حب بين اتنين، خاصة أن ارتباطنا كان مبنى على الاحترام، ومفيش فيه أى خروج على الآداب"
وأضاف المتهم"طلبت من أبويا يجوزنى "سمارة" وقولتله انى بحبها، لكن أبويا رفض وقالى انسى الموضوع دا، وفى بنت تانية هنخطبهالك، ومع كل محاولات الاقناع أصر أبويا على موقفه، وانا عشان لسه صغير مقدرتش أخالف أمره، وقررت انى لازم انسى قصة الحب دى، وعرفت "سمارة" باللى حصل وموقف ابويا وقولتلها لازم ننهى اللى بينا، لكن هى كانت رافضة ان اللى بينا ينتهى بالشكل دا، خاصة إن علاقتنا بدأت من 4 سنين".
وتابع المتهم حديثه قائلا" العلاقة اللى بينا فعلا انتهت لمدة 4 شهور، وخلال الفترة دى أنا خطبت بنت تانية، لكن من اسبوعين قبل الحادثه ما تحصل علاقتى بسمارة رجعت تانى، لان اللى بينا قصة حب طويلة، وهى كانت مصرة على الرجوع ليا مرة تانية، وفوجئت أنها بتهددنى بفضح العلاقة اللى بينا، واحنا عشان فلاحين حاجة زى دى ممكن تفسخ خطوبتى، عشان كدا قررت اشوف حل لتهديدها ليا، وملقتش أى حل غير أنى اقتلها، اتصلت عليها وطلبت منها تقابلنى فى أرض زراعية بعيدة شوية عن القرية اللى عايشين فيها، وساعتها انا جهزت سكين المطبخ وقابلتها فى المكان اللى اتفقنا عليه، واكلمت معاها شوية ولما لاقيتها مصرة على موقفها، هجمت عليها وكتمت نفسها وسددت له الطعنات فى رقبتها وجسمها لحد ما ماتت، وبعدين خدت تليفونها ورجعت على البيت، سعاتها مكنتش عارف أعمل إيه ولا اتصرف إزاى، وخفت أهرب عشان لو سبت البلد المباحث هتشك فيا، وفضلت فى البيت لحد ما فوجئت بالمقدم محمد سعد رئيس مباحث مركز أطفيح بيقبض عليا وساعتها أتأكدت إن الموضع إنكشف، وإنى خلاص رحت فى داهية"

تلك الاعترافات سردها المتهم أمام اللواء خالد شلبى نائب مدير الإدارة العامة لمباحث الجيزه بعد القبض عليه، حيث توصلت التحريات إلى أن المتهم إرتكب الجريمة خشية فضح علاقته بالمجنى عليها، واستولى على الهاتف المحمول الخاص بالضحية، وضبط العقيد عبد الحكيم سعد مفتش مباحث جنوب الجيزه الهاتف والسلاح المستخدم فى الجريمة بمسكن المتهم، وحرر محضر بالواقعة وأخطرت النيابة التى أمرت بحبس المتهم على ذمة التحقيق وتشريح ودفن جثة المجنى عليها وباشرت التحقيقات.