حكايات زوجات جهزن لعيد حب ساخن بس الليلة باظت.. زوجة: "اتماكيجت" لجوزى سابنى واتفرج على الماتش.. وأخرى: الأكل اتحرق والشمع ولع فى المفرش.. وزوجة: اتنكرت عشان أهزر مع جوزى راح ضربنى عشان يطلع الجن

"ومن عيد الحب ما قتل".. هذه الجملة تصف حال كثير من الزوجات فى عيد الحب المصرى، فبعد أن جهزن لليلة رومانسية رائعة اصطدمت أحلامهن بالواقع، فى ظل نسيان الزوج أو اعتبارها مجنونة، وهنا جمعنا مجموعة من القصص لنساء جهزن لليلة رومانسية فى عيد الحب ولكن اصطدمت أحلامهن بجفاف مشاعر الرجال أو بالقضاء والقدر.

لبست لجوزى فى الفالنتين بس دخل يتفرج على الماتش والليلة باظت

"ليلة عيد الحب قررت أعمل جو رومانسى لجوزى بس الليلة باظت".. بهذه الكلمات بدأت هند.م، تحكى قصتها لـ"اليوم السابع"، مضيفة أنها جهزت عشاء رومانسيا مع الشموع وارتدت أفضل ملابسها وقامت بعمل ماكياج، ولكن المفاجأة أن الزوج جاء وأطفأ الشموع وفتح التليفزيون وتجاهلها وقال "الماتش جه".

عملت لجوزى العشا اللى بيحبه بس الأكل اتحرق والليلة قلبت غم

قررت أسماء.ن أن تجهز ليلة رومانسية لزوجها فى عيد الحب، وقررت أن تجهز عشاء ودخلت إلى المطبخ، وقامت بعمل بيتزا وكيكة فى الفرن، ولكن أثناء استعدادها لليلة عيد الحب، شمت رائحة احتراق الطعام، وقالت أسماء "الأكل اتحرق وملحقتش أعمل أكل جديد جه جوزى وزعق أما ملقاش أكل فى البيت".

"الشمع ولع فى الدرة".. ليلة الشموع الرومانسية قلبت منزل الزوجية لحريق

"الشمع ولع فى الدرة".. تحولت الليلة الرومانسية التى كانت "مي.أ" تجهزها لزوجها للاحتفال معه بالفالنتين إلى ليلة مأسوية، حيث قالت مى: "جهزت المنزل بالشموع والورد وجهزت نفسى لليلة رومانسية مع زوجى، ولكن أثناء انشغالى فى المطبخ تعرضت غرفة النوم للاحتراق وشممت رائحة الحريق، وهكذا تحولت الليلة إلى ليلة سوداء، وكل عيد حب لازم تحصل مصيبة عندنا، فقررت أنى محتفلش بعيد الحب تانى".

عملت ليلة ولا ألف ليلة بس أهل جوزى عملولنا زيارة مفاجئة

تحكى شاهندة.م، قائلة: "عملت ليلة رومانسية وحركات واتصل جوزى يقولى محتاجة شىء فى البيت، قلتله لأ سلامتك يا قلبى، بس لما جوزى جه قالى إن أهله طالعين على السلم، وقعد يلم معايا الشموع والزينة اللى كنت مجهزهاله فى الفالنتين، ومن يومها حرمت أحبك متحبنيش، مبقتش أعمل عيد حب فى البيت".

صاحبتى نصحتنى ألبس تنكرى والنتيجة جوزى افتكرنى اتلبست

قالت "أسماء.ش": "صاحبتى نصحتنى ألبس ملابس تنكرية فى الفالنتين، فاتنكرت فى لانجيرى يشبه الفرخة، وألقيت الحبوب على الأرض، ففوجئ زوجى بالمشهد، وافتكرنى اتلبست وقعد يضرب فيا بالحزام عشان يطلع الجن اللى لبسني، ولأننا ساكنين فى بيت عيلة أهله طلعوا وفاكرين أنى ملبوسة بجد".

لبست لجوزى بس قالى ألبسى تقيل أحسن تبردى ومين يأخد باله من العيال

قالت سارة.س: "ارتديت أفضل ملابسى لليلة رومانسية مع زوجى ونثرت الورد على الأرض وأضأت الشموع، وعندما جاء زوجى تفاجأ وقال لى: "هو الكهرباء قاطعة عشان كده مولعة شمع"، وايه اللى رامى البطاطس على الأرض، افتكر الورد بطاطس، وقالى "ايه اللى أنتى لابساه ده البسى تقيل أحسن تبردى، ساعتها مين هيأخد باله من العيال، وأما قال كده قلتله "النهاردة عيد الحب وأنت ما عندكش مشاعر ولا أحاسيس والليلة أتقلبت خناقة".