بعد مرور 5 سنوات على قتلها وزوجها لابنها ينكشف المستور.. المتهمة: "جوزى ضرب إبنى بالشلوت بسبب تبوله اللاإرادى فمات"..و"أقنعنى إننا نلفه فى شوال ونرميه فى المقابر".. وشجارهما يكشف للجيران سرهما

لم تكن تتخيل يوما أن جريمتهما التى أقبلا عليها سوف يتم اكتشافها بعد مرور 5 سنوات على ارتكابها، والأدهى والأمر من ذلك أن تكون تلك الجريمة هى قتل ابنها على يد زوجها، ذلك ما حدث مع "نسمة.ص."، ربة منزل، وزوجها "خالد.ح"، مبيض محارة، بمنطقة المرج .

كشفت التحقيقات فى القضية المقيدة برقم 2869 لسنة 2012 إدارى المرج، أن المتهمة "نسمة.ص."، ربة منزل، أم لطفلين، توفى أحدهما بعد ولادته بأشهر معدودة، والثانى يدعى "وليد" 3 سنوات، وأن السيدة سيئة السمعة، حيث سبق لها الزواج ما يقرب من 6 مرات دون انتهاء العدة التى حددها لها الشرع، ما يعد جريمة أخرى يعاقب عليها القانون .

روت المتهمة تفاصيل قتل زوجها لابنها البالغ من العمر 3 سنوات: "أنا اتطلقت من جوزى بسبب المشاكل والظروف المالية، ومقدرتش أتحمل العيشة معاه، وهو كان بيحاول يصبرنى وينفذلى كل طلباتى، لكنى بردوا مقدرتش أكمل، وبالفعل طلبت منه الطلاق، وطلقنى ووافقت على جوازى من (خالد.ح)، مبيض محارة، وهو كمان كان عنده بنت صغيرة، وقولت يمكن هو دا اللى هيعوضنى تعب السنين اللى فاتت" .

وأضافت المتهمة: "وبعد مرور عدة شهور من جوازى لقيت "خالد" بيعامل ابنى (وليد) معاملة مش كويسة، وحذرته من الموضوع ده أكتر من مرة، رغم إن أنا كنت بعامل بنته زى ابنى، وهددته إنى هتطلق منه لو كرر معاملته السيئة لابنى تانى، وبسبب معاملته السيئة دى واستمراره فى تعنيفه الولد بقى يخاف منه جدا لغاية ما أصيب بمرض التبول اللاإرادى، وبعدها زاد ضربه وتعنيفه ليه".

وتابعت المتهمة: "فى عام 2010 تقريبا ابنى كان بيلعب فى صالة الشقة وفى الوقت دا تبول على نفسه بسبب مرضه، ولما جه (خالد) يعنفه زى كل مرة، قام ضاربه بالشلوت فى فم المعدة، ولأن الولد لسه طفل، فضل يصرخ بشكل هستيرى ويتلوى ويتمرمغ على الأرض، ساعتها طلبت من (خالد) إنه يسعف الولد ويجيب عربية إسعاف بسرعة أو ناخده على أقرب مستشفى، لكنه رفض وقالى إنتى عاوزه تودينى فى داهية الواد هيموت دلوقتى والضربة ظاهرة فى بطنه، وهيبان إنى كنت بعذبه" .


واستطردت المتهمة: "وبالفعل "خالد" قدر يقنعنى إننا لازم ما نروحش بالولد على المستشفى وبعد أقل من ساعتين الولد كان لفظ أنفاسه الأخيرة، وجوزى اتفق معايا إننا ناخد الولد ونلفه فى شوال ونرميه فى مقابر الخانكة، لإن الواقعة حصلت لما كنا ساكنين فى الخانكة، ولإننا مكناش نقدر ندفن الولد بسبب تصريح الدفن اللى ممكن يكشف الموضوع" .

وتابعت المتهمة: "بعده قررنا نروح نعيش فى المرج وبعد 5 سنوات من وفاة ابنى حصلت مشكلة بينى وبين جوزى، وهددنى إنه هيسيبنى ويرمينى فى الشارع، رحت أنا كمان هددته إنى كشف حقيقة موت ابنى على أيده، وساعتها حد من الجيران كان سامع المشاجرة اللى حصلت بينى وبينه، والسر اللى كنت مخبياه من 5 سنين طلع للنور، والناس فى المنطقة بدأت تتكلم فى الموضوع، لغاية ما الشرطة كشفت الحكاية وتم القبض علينا " .

وقرر أحمد جاد، مدير نيابة حوادث شرق القاهرة الكلية، وبإشراف المستشار محمد عبد الشافى، المحامى العام الأول، إحالة السيدة وزوجها إلى المحاكمة الجنائية العاجلة، على خلفية اتهامهما بالقتل العمد لابنها مع سبق الإصرار والترصد، بمنطقة المرج .