"شعر صدره... جزمته.. شنبه.. ريحته" أغرب أسباب البنات لرفض العرسان.. النظافة الشخصية والمظهر هو سر القبول لدى الفتيات.. ومواجهة الأهل بسبب الرفض الحقيقى مستحيل

الزيجات لا تُهدم فقط على "طقم جيلى" و"مين اللى هيجيب البيبسى"، فهناك الكثير من الأسباب التى كانت كافية لأن تنهى زواجا قبل أن يبدأ، أو حتى فى منتصف الطريق، بمنطق "بين الشارى والبايع يفتح الله"، قررت الكثير من النساء رفض "عرسان زى الفل" لأسباب وجدن أنها غير مقبولة على الإطلاق، ولا مجال للنقاش والتفاوض عليها، فهى بالنسبة لهن "النهاية".

سألناهن عن أغرب الأسباب التى دفعت بعضهن إلى رفض عريس من المؤكد أنه قدم عن طريق "الصالونات"، فرحل كما جاء لسبب أخفته العروس فى قلبها حتى لا يسخر منها من حولها، أو لا يتعامل معها البعض على أنه طريقة مبتكرة "لتطفيش" العريس.

"شنبه"

"والله لو آخر راجل فى الدنيا" هكذا بدأت "م.ك" حديثها إلى "اليوم السابع" عن سبب غريب رفضت من أجله يومًا عريسا لا يعيبه شىء، فقالت "أنا "بقرف" من الشنب، وهو بالنسبة له حاجة مهمة، عمره ما هيستغنى عنها، بس أنا بردوا مقدرش أتجوز راجل عنده شنب، ده موضوع عندى منتهى، بس طبعًا لما سألونى إيه سبب الرفض اتحججت بأنه مش عايش فى القاهرة وأنا مش هقدر أسيب هنا خالص، وكانت النهاية، "قال أتجوز راجل بشنب قال".

"شعر صدره"

حكاية أخرى وسبب آخر غريب كان مبررًا لرفض عريس، تقول "ر.ح" "أنا كنت فرحانة جدًا بيه، راجل محترم وشيك وشغال فى بنك، وما شاء الله مرتبه كويس، المهم أول قاعدة عدت كويس ومفيش مشاكل، واتفقنا تقريبًا على حاجات كتير، لحد ما جيه معاد القاعدة التانية اللى كان لابس فيها تى شيرت، وشوفت الصدمة، ياخرابى "ده عنده شعر فى صدره.. وكمان كتير"، ومن وقتها وأنا ببذل قصارى جهدى إنى أنهى الموضوع بشياكة من غير ما حد من أهلى يعرف السبب الحقيقى".

"ريحته"

هكذا بدأت "ولاء.ط" حديثها "كان سبب ينهى الموضوع من على باب الشقة، من أول داخلة وهو ريحته ما شاء الله كانت كافية عشان أقوله لأ فى وشه، ومع ذلك كل اللى حواليا قالولى اصبرى يمكن جاى مستعجل وملحقش ياخد دش، بس الموضوع اتكرر تانى وتالت، وهو مبيتغيرش، بقعد معاه وأنا مش قادرة أتحمل، ومع ذلك أهلى قالولى هترفضيه عشان ريحته وحشة؟، وكأنها حاجة غريبة يعنى، ومع محاولاتى المستميتة والإلحاح نهيت الموضوع نهائيًا".

"جزمته على طول عليها تراب"

قبل أن تذهب لطلب عروسة عليك أن تتأكد من أن جزمتك فى حالة جيدة، وأنها خالية من الأتربة حتى لا تنول مصير من قبلك، تقول "س.م"، "أنا الراجل بالنسبالى مش فلوس ولا أى حاجة فى الدنيا"، أنا أهم حاجة عندى الأناقة والنظافة، وهو ما لاحظته فى الجلسة الأولى بعريس الغفلة، الذى جاء إلينا 3 مرات تقريبًا، وفى كل مرة ألاحظ عليه نفس المُلاحظة، وهو أن حذاءه غير نظيف، وتضيف "أنا عارفة أن ده سبب ممكن يكون غريبا ومُضحكا للناس، بس ده سبب كافى يخلينى أرفض عريس، يمكن غريب بس مش حاجة سهلة إنى أتجوز راجل مش مهتم بنظافته الشخصية".