بالكاركاتير.. للمقبلين على الزواج: حطوا اللى هتتجوزوه فى خلاط اختبارات يا يفرهد يا يبان على حقيقته.. الرجال: اتجوزها بضمان قابل للرد..السيدات:لو مصممة على الجواز اعرفى إنك داخلة السرايا الصفرا برجليكى

الزوجات: لو كان ساكت وهادى قبل الزواج اعرفى أنه بيتمسكن، لو بيزعق وعصبى اعرفى إن أيامك سودا لأنه هيمد إيده، لو بيضحك ويهزر مع البنات ولما تضحكى مع حد يقولك "لا" اعرفى إنه معقد.. لو مسهوك اعرفى إنه ميملاش عينه غير التراب، ولو لسه مصممة على الجواز اعرفى إنك وافقتى تدخلى السرايه الصفرا برجليكى.

الأزواج: لو كانت ضاربة دوكو فى وشها متتجوزهاش، ولو كانت بتبرق فى الضلمة اعرف إنها مجنونة، ولو اتكعبلت وأنت رايح الخطوبة اعرف إنها نحس ومتكملش عشان متندمش، ولوعندها عقدة المساواة هتزلك عشان تاخد حقوقك، ولو رغاية اعرف إنك مش هتعرف تعملها –سيلنت- يعنى من الآخر اتجوزها بضمان قابل للرد عشان تريح دماغك.

ما سبق ردود سيدات ورجال بعد وقوفهم أمام محاكم الأسرة فى محاولة لإنهاء حياتهم سويا وجميعهم متفقون على قول واحد "حطوا اللى هتتجوزوه فى خلاط اختبارات يا يفرهد يا يبان على حقيقته".

"اليوم السابع" يرصد قصصًا واقعية لمشاكل الأزواج لأسباب غريبة والتى صادفتنا أمام محاكم الأسرة خلال 2015 ولسان حالنا ومتابعى نسب الطلاق.. "لما أنتوا مش أد الجواز بتنيلوا تتجوزا ليه!!!".

ترك زوجته بسبب كبر أذنيها وبشاعتها دون –ميك اب-فردت عليه بطلب الخلع

نوبة ضحك هستيرية وعلامات تعجب على وجه الزوج، كان ذلك عندما ذهب برفقتها إلى عش الزوجية بعد عقد القران وكله لهفة وشوق أن يرى حبيبته.. دقق النظر فى أذنيها ووجها بدون الدوكو والبويه التى كانت تواظب على وضعهما خلال فترة تعارفهما ورآها وتساءل: هل سأتحمل هذه البشاعة كثيرا؟ ثم اعتاد أن يحرجها فتشعر بالنقص.. ذلك ما جاء فى دعوى الخلع رقم"1987"لسنة2015 أمام محكمة الأسرة بالجيزة.

زوج يرى زوجته شؤم وسبب فشله

مكنش بيقولى غير يـا "بومة" وعقدنى فى حياتى.. إذا لو تزوجتى رجلاً "موسوساً؟ ستكونى على موعد مع قصة كالتى عاشتها "ندى" قبل أن تقرر الانفصال عن "خيرى"، ندى اتهمها زوجها كلما وقعت كارثة بأنها "شؤم" واتخذها "شماعة" يعلق عليها فشله، خسر أسهمه فى البورصة فاتهمها بأنها السبب وكأنه تزوجها لتكون خبيرا ماليا واقتصاديا وحينما اُجهضت اتهمها بـ"النحس"، ساءت أخلاقه واعتاد الشرب والسهر فقررت "خلعه".. وجسدت الرواية الدعوى رقم 3722 لسنة 2015 أمام محكمة الأسرة بإمبابة.

الصلع شبح الزوجات.. والحل هو الخلع

شعره طار وبقى وحش ومش مضطرة أستحمل تريقة صحابى عليه.. قولتله من الأول اهتم بنفسك "مها" وصفت صلع زوجها بالكارثة وطالبت بالخلع.. وقفت تبكى أمام المحكمة وعندما استمع إليها مكتب التسوية أصابه الذهول ورسمت ابتسامة على وجوه الجميع.

تخلع زوجها لشعورها بالغثيان منه وعدم اهتمامه بنظافته الشخصية

النظافة النظافة النظافة.. ويقولك هما ليه الستات ليهم الجنة مهو من اللى بيشوفوه مع الرجالة.. الراجل من دول يبقى قبل الزواج عامل فلانتينو وبعد كدا ينقلب 180 درجة ويبقى فرح لو اهتم بنفسه وفكر فى الاهتمام بنظافته لدرجه شعورى بالغثيان والقرف منه.. أغرب ما جاء فى الدعوى رقم 2789 لسنة 2015 أمام محكمة الأسرة من "هبة.ا" ضد زوجها "رضا.ك".

طردنى من بيتى عشان حبه المرضى للحيوانات

خلانى أكفر بالحياة الزوجية كان بيقارنى بحيواناته الأليفة، طردنى من بيتى عشان اعترضت على وجودها.. عيشتى معاه كانت تجيب السكر والله .. حكاية نوران مع محمد كانت حديث محكمة مصر الجديدة من خلال دعواها رقم 1023 .

نوران ردت على السخرية: اللى إيده فى الميه مش زى اللى إيده فى النار- بعد سنة و5 أشهر زواج وعذاب بسبب حبه المرضى للحيوانات وإدراكها أنه مريض ومرضه عبارة عن 3 كلاب و7 قطط وزواحف وثعابين مكانتها عنده أهم من زوجته بمراحل .

إسقاط رؤية رجل لابنه بعدما اصطحبه إلى ملهى ليلى

الهم عارف صحابه –بتلك الكلمات وصفت -هويدا -زواجها بـ"خالد " الذى استمر 7 سنوات وانتهى بالطلاق بسبب عمله وإدمانه للمواد المخدرة ولكن ما لم تتوقعه أن يأخذ ابنهما الصغير "سيف"- 6 سنوات- معه إلى عمله بأحد الملاهى الليلية..الواقعة جسدتها دعوى إسقاط الرؤية داخل محكمة الأسرة بمدينه نصر رقم 256 لسنة 2015.

فى دعوى خلع: عض أذن زوجته فقطعها بعد خلاف بينهما

مسعور ومش بيفهم ولا يستوعب وبيتكلم بإيديه.. حالة عاشتها "ميادة.م" وصرحت بها فى دعوى خلع ضد زوجها "شوقى.خ" أمام محكمة الأسرة بزنانيرى بعد خلافات استمرت سنتين بسبب ضربها وإهانتها المتكررة فى الساعات القليلة التى تجمعهما بعد عودتهما من العمل وفى آخر خناقه عض أذنها فقطعها وذهبت إلى المستشفى غارقة فى دمها وبعدها قررت عدم العيش معه.

تستغيث: زوجى عنده فوبيا من المياه

لم يكن بمقدورى التمييز والحكم على الأشخاص بسبب صغر سنى فوقعت فى "شعبان" بعد إجبار أهلى لى على الزواج منه ومن وقتها عايشه أسود أيام حياتى .هكذا قالت "زينب.م"، فى دعوى الخلع أمام محكمة الأسرة بإمبابة بعد أن استمر زواجها 3 سنوات من الاضطراب الذى اتضح بعد شهر العسل بسبب فوبيا خوفه من المياه، واستيقاظه ليلا ليضربها ويتهمها بأنها تريد أن تغرقه.