وائل عبد الودود حسين يكتب : السين والصاد

قولوا لنا ايه اللى بأيدينا نعمله
ايه اللى ناقص ونكمله
ايه اللى ما يل ونعدله
احنا صبرنا كتير وتعبنا من المشاوير
والحال واقف والخلق ضيق
وانا مش عايز أتعيق
لا طالب قصر ولا عمارة
ولا عايز أكون من الأغنياء الكبارة
انا طالب سين صاد
ستر وصحة زى العباد
وأشوف عيالى مستورين
متعلمين متنورين واكلين وشبعانين
مرتاحين مبسوطين ولا عمرهم محرومين
اروح من شغلى مرتاح البال
لا شايل هم طلب وسؤال

للبيت وللعيال
ولا اجيب منين وازاى
وأستلف المرتب اللى جاى
واصبر نفسى بضحكة حلوة
أو اسمع للست غنوة
وأصلى ركعتين لله
واطلب منه النجاة
ويعينى على الحياه
وتنزل دمعتين منى
قلبى ضعيف رغم كبر سنى
وأحس بانشراح
وأن القلب كثير ارتاح
وأن الدنيا ما تسوى شىء
ورضاه هو كل شىء
ولما يرضى رب العباد
هيرزقك السين والصاد