تفاصيل هتك عرض فتاة روض الفرج.. المجنى عليها: "جارى اغتصبنى بعد ما هددنى بمطوة واكتشفت بعدها إنى حامل".. و"الدكتور كان هيموتنى وهو بيعملى عملية الإجهاض".. والنيابة تأمر بحبس المتهم والطبيب 4 أيام

لم تكن تتخيل يومًا أن حملها سيدفعها للتخلص من الجنين خوفًا من الفضيحة بعد إخفاء واقعة هتك عرضها عن أسرتها، ما أدى إلى فضح سرها وتعرضها للموت أثناء قيامها بعملية الإجهاض بروض الفرج.

وقالت "ف.أ" المجنى عليها "18 سنة"، فى تحقيقات النيابة العامة التى أجراها المستشار شادى سيف، وكيل النائب العام، وبإشراف المستشار محمد عادل، فى القضية المقيدة برقم 1293 لسنة 2015 إدارى روض الفرج، إنها تعرضت لواقعة الاغتصاب على يد ابن الجيران "أبنوب.ن"، عاطل، بعد أن أشهر فى وجهها سلاح أبيض "مطواة" و تهديده لها بالقتل، حيث حاولت الدفاع عن نفسها عن طريق الاستغاثة بالصراخ إلا أنه نجح فى تهديدى وإسكاتى".

وأضافت المجنى عليها: "بعد ما نجح أبنوب فى اغتصابى مقدرتش أنطق بكلمه بعدها، أو أعترف لأهلى بالمصيبة اللى حصلتلى، وأصابتنى حالة نفسية بعدها خليتنى على طول ساكتة مبتكلمش مع حد، لدرجة إن أهلى لاحظوا إن فى حاجة غريبة، ومع مرور الأيام قدرت أقنعهم إنى تعبانه نفسياَ مش أكتر".

وأشارت المجنى عليها: "وعدت الأيام لغاية ما حسيت بألم فى معدتى وترجيع كنت فاكرة ساعتها إنهم شوية برد وهيروحوا لحالهم، لكن لما لقيت الألم بيزيد روحت كشفت الدكتور قالى إنى حامل ساعتها إتمنيت إن الأرض تنشق وتبلعنى، ومكنتش عارفة أعمل إيه، وفضلت مخبية الخبر على أهلى، ولما بلغت أبنوب باللى حصل، اتهرب منى وقالى أنا معرفكيش ومعرفش اللى فى بطنك ده يبقى ابن مين، وساعتها قررت إنى أتحمل المسئولية لوحدى" .

وتابعت المجنى عليها: "قررت إنى أنزل الجنين وسألت على دكتور بيعمل النوعية دى من العمليات، لغاية ما حد دلنى على دكتور اسمه "م .ب"، بيعمل عمليات إجهاض وترقيع وحاجات ذى دى فى عيادته بملبغ 3 آلاف جنيه، ونصحنى إننا نعمل عملية الإجهاض بعد مرور 5 شهور على الحمل عشان ما يكونش فى أى خطورة، وفعلاَ أول ما بطنى بدأت تكبر ويظهر عليها الحمل، روحت للدكتور أنا وواحدة صاحبتى كانت معايا" .

واستطردت المجنى عليها: "وعملى العملية ولما فوقت لقيت نفسى مش فى عيادة الدكتور وإنى فى غرفة الرعاية المركزة بالمستشفى، وأمى موجودة معايا، ولما سألت إيه اللى حصل وماما عرفت وجت إزاى، أمى قالتلى إنى كنت هموت والدكتور بيعملى عملية الإجهاض، وصحبتى هى اللى نقلتنى على المستشفى، وهو ده كل اللى حصل" .

وكشفت التحقيقات عددا من المعلومات الخاصة بالطبيب المتهم والتى تمثلت فى مسكنه، وعنوان المركز الطبى الذى صدر بحقه قرار الإغلاق، ورقم التراخيص وغيرها من المعلومات.

وبسؤال "م.ن"، عاملة النظافة بالمركز، أكدت أن جثمان الجنين عثرت عليه قوات الشرطة داخل ثلاجة المركز الطبى ملفوفاَ بكيس أسود، مشيرة إلى أن الطبيب يعمل هذا العمل منذ سنوات وأنه أجرى العشرات من تلك العمليات المخالفة للقانون والشرع.

من جانبه، قرر المستشار شادى سيف، وكيل النائب العام، وبإشراف المستشار مازن يحيى، المحامى العام الأول لنيابات شمال القاهرة الكلية، حبس "أبنوب.ن"، عاطل، 4 أيام على ذمة التحقيقات، لاتهامه بهتك عرض فتاة روض الفرج، كما أمر بحبس الدكتور "موريس.ب"، 4 أيام على ذمة التحقيقات، لاتهامه باستخدام عيادته فى عمليات الإجهاض والترقيع، فضلأ عن تشميع العيادة .

موضوعات متعلقة:

حبس عاطل 4 أيام لاتهامه بهتك عرض فتاة فى روض الفرج