طبعاً كل الناس اليومين دول بيتكلموا عن موضوع إسكندرية وإن إسكندرية بتغرق والسيول اللى نزلت على إسكندرية... إلخ أحب أقولكم إن انتم فاهمين الموضوع غلط، وإن كل الكلام اللى دائر بين الناس ده ليس له أى أساس من الصحة وخاصة موضوع الصرف لأن إسكندرية أكيد فيها شبكة صرف صحى دى برضه محافظة الإسكندرية (العاصمة سابقا) هى بس الفكرة إن المسئولين كانوا بيدرسوا من فترة دراسة نظرية أنه ممكن نصنع فينسيا جديدة من إسكندرية وإن الناس تمشى من مكان لمكان بالمركب مش بالعربية طبعاً.
كل ده نوع من تنشيط السياحة ومحاولة لإرجاع الطليان ليعيشوا فى إسكندرية زى زمان كل ده كان مجرد دراسة بس دراسة خيالية شوية وأثناء اليومين اللى فاتوا كانت بداية تنفيذ الفكرة عمليا. منها أننا نحاول نمد فترة الصيف أكثر شوية ونخلى الناس تبلبط لآخر مرة لأن خلاص الشتاء على الأبواب، ومنها أننا نجرب برضه ونشوف فكرة فينسيا ها توصل لإيه وممكن تنجح ولا لا؟ من غير ما الشعب يكون عارف عشان الفكرة متتنظرش ولا حتى أهل البلد اللى هيتم عليهم التجربة تكون عندهم خلفية أو فكرة عن الموضوع.
بس هى دى كل القصة انتوا بتتكلموا فى إيه يا جماعة وبرضه الشائعات المغرضة اللى بتقول إن هانى المسيرى استقال أو تمت إقالته عشان فشل.
يا جماعة الراجل شالوه من منصبه عشان هيمسك الإشراف على المحافظات العائمة فى مصر، وذلك لنجاحه فى الإشراف على المحافظة الأم إسكندرية... نحاول نصلح معلوماتنا بقى شوية يا جماعة.. نحاول منتكلمش ولا ننشر أى حدث غير لما نتأكد ده وراه.
إيه مش يمكن تكون وراه حاجة كويسة وخير لينا وإحنا مش عارفين؟!
نحاول ننظر للمواضيع بنظرة أعمق بلاش النظرة السطحية وتأكدوا تماما أن المسئولين قلبهم علينا وعايزين راحتنا دى حاجة مفيش فيها شك، وأخيراً نصفى النية شوية إذا كنتوا عايزين تستمتعوا بحياة أفضل فى مصر.
الإسكندرية تغرق فى شبر ميه
لا توجد تعليقات على الخبر
تم أضافة تعليقك سوف يظهر بعد المراجعة