أحمد الغرباوى يكتب: مسامحك

مسامحك..
غصب عنى.. لازم
أسامحك..؟
ما أنا ما عرفتش
حـبَ غــير
حبك..!
ولا تمنيت فى حياتى
بَعدك..!
ولا فكَرت
فى واحدة تانية
تحل محلك.. ولا
مثلك..!
ما روحى هِيا اللى
سالت بين
صوابعك..!
لما نامت فى حضن
كفك..!
عايزة تشم عطر
جلدك..؟
وتدخل وما تخرجش
أبداً من حنايا
لحمك..!
ويِسكَر الحب عينها
عن أى شىء إلا
عشقك..!
فظــنت إن
فى بطن إيدك
روحك..!
,,,,,
مسامحك..
ما أنا ما عرفتش
غير شمس واحدة
بتنور شروق يومى
لقمر شايل
وجهك..!
ولا عرفت نهار ينتهى
غير ما ييجى ليل
وفى حلمى تغطى راسى
فى حجرك بجيب
جينزك..!
إعذرنى لما كده
بعيشك.. وحقيقى
عِشتك..!
وفى عشق روحى
لم أعرف
غيرك..!
,,,,,
مسامحك..
رغم كبر سنى
وترحالات عقلى
لم أكتشف قلبى
إلا.. إلا فى
عِشك..!
وروحى ردت لما
يغرد عصفور عاشق
صباح كل جمعة على شباك
نافذتك..!
,,,,,
مسامحك..
حتى لو قفلت الشباك
وبدل ألمى رويته بــ
صمتك..!
بس.. أرجوك حبيبى
لما تلمس أنامله
ثوبك..
وبشفايفك يتعشى ليل
عُرسك..
إفتحى الأنــوار
فجرحى يلتئم يوم
فرحك..!
وأخيراً..
أخيراً تغسَلنى روحك
بدمى المتدفق فى
جرحك..!
الآن.. الآن فقط
لم يعد لى غير
حب فى الله..
ودوامى فى
نبضك.. !
و.. و
أسامحك..!

*****
مسامحك..؟