سيد منير عطية يكتب: وليه أحلم

وليه أحلم...
مدام الحلم م الآخر
هيبقى كابوس يكتفنى
ويرسمنى
خيال مربوط على الهامش
ولو شافنى ف يوم عايش
هيرمينى ف ميت توهة
ودنيا بجد معتوهة
بترفعنى كما الريشة
وترمينى ف سابع أرض
وليه أضحك...
مدام الضحكة حزنانة
وغرقانة
ف بحر دموع مالوش مينا
وموجة تجر ف سفينة

تاخدها جزيرة مسحورة
ف عصر الناس ما تعرفهوش
مافيش إلا وحوش ف وحوش
مخالب تنهش الأبدان
وترميهم ف عز البرد
وليه أصرخ...
وأنا صوتى الضعيف عاجز
يفوت خارج حدود حلقى
وحبل الصوت بقى لشنقى
وآهه تصارع التانية
عشان تخرج
لكن أبدا ما تخرجشى
ف ترجع ف الوريد تمشى
تزلزلنى بصوت الرعد
وليه أبكى...
وأنا الدمع اللى جوّايا

مالوش آخر
لو اسمحله ف يوم ينزل
هيبقى محيط
ولو حتى ما كانش محيط
هيبقى زى نهر النيل
ف يوم ما يفيض
ما يقدر يحجزه ميت سد
مانيش هحلم ولا هضحك
ولا أصرخ ولا أبكى
ولا هشكى ف يوم البُعد
أنا عن كل ده مرتد
م أنا يا حبيبتى م الآخر
بنيتك فيّا صرح كبير
وفجأى..
كل شىء اتهد