صدقينى يا حبيبتى ابتديت أفكر إنى أكرهك بكل صراحة وجدّية
القرار مدروس من غير لجان تجتمع وتنفض على الطبلية
ومن غير خطط طويلة المدى ولاخطط متصربعة خمسية
القرار جرىء شجاع مش عايز كوزين اسمنت وعصاية غليه
ومحدش يقوللى مش حتقدر كان غيرك اشطر خيبتك قويّة
صعبان على حالى لا شغله ولا مشغلة ومشتاق للقمة هنية
بينوروكى بكهربا ضلمة والناس يام النيل بتشتكى قلة الميه
القرار مش من عمايلك ياحبيبتى ولكن بسبايب البلطجية
السافل وآخد حقه وزيادة بطولة لسانة وبشلة من الشضليه
ياحبيبتى البلطجى بقى من اصحاب السيادة وسيّد الأفندية
وانا غلبان ماليش ضهر وزيى كتير والحيطان ياما مداريّة
كنتى بتمسحى دمعى بمنديل حنانك قبل مايخطفوه الإرهابية
ودلوقتى اديتينى ضهرك وهجرك ليه يا أغلى من نور عينيه
أنا اللى حبيتك من غير مصلحة والقرار غصب عنى مش بايديه
القرار داخلى يادوب أمضيه وادورلى على تربة تستر عليّه
وتحمينى من البلطجية اللى معروفين بالنفر لوزارة الداخلية
الشوارع بتترعش منهم والناس بتتشاهد فى الروحة والجاية
ومنهم اللى طايحين تسطيح لعقول الناس ويقولوا حرية إعلامية
ماهى البلطجة بقت مودرن من غير جنازير ولامطاوى مصدية
البلطجة بقت لايف وهى فى مصارفنا الفضائية جهبذة حصرية
لكن اطمئنى ياحبيبتى ماحدش حياخد فى قلبى مطرحك ميه ميه
ولو كان القرار حيزعلك اعتبريه للتسالى والضحك زى الخطط التنموية
خايف من يوم امشى فى الشارع العيال يغنوا ورايا محتاج لعنبر انفرادى فى العباسية
مصر بقت حلة برستو اللى فيها استووا بالضغط ياحكومتنا الرشيدة خفى شوية
صورة أرشيفية
