بين الطبخ والوصفات والفضول.. أسباب الرجال للتلصص على المنتديات النسائية

"للبنات فقط" "ممنوع دخول الرجال" عبارات تحذيرية مقتضبة تومض باللونين الأحمر والأزرق كى تلفت الانتباه، تعلن عن مساحات خاصة بالنساء فقط، وتحذر الرجال من دخولها لكنها تكون أول ما يلفت انتباه الرجال.

صفحات متعددة على الويب تحمل التحذير نفسه، وتحمل للرجل نفس القدر من الفضول للتعرف على عالم البنات، وتتحول هذه المساحات المخصصة للبوح النسائى والاستشارات والاعترافات أحيانًا إلى مصدر الرجال للتعرف على عقول النساء وأحيانًا الاستفادة من خبراتهن، فيتجاهلون التحذير ويتلصصون من بعد على المنتديات النسائية، أحيانًا يكتفون بالزيارة وأحيانًا ينتحلون اسم فتاة لدخول المناطق المحظورة.

4 من هؤلاء الرجال اعترفوا لـ"اليوم السابع" بالدوافع وراء اختراق الأسوار الافتراضية لعالم النساء، التى ننقلها لكم فى السطور التالية..

"ممنوع دخول الرجال" خليتنى عايز أعرف البنات بيفكروا إزاى

ربما لأن "الممنوع مرغوب" أو لأن عالم النساء دائمًا ما يكون مليئا بالمحظورات والخطوط الحمراء المثيرة للفضول، ولأن الجميع يقول إن للبنات عقلية خاصة لا أحد يفهمها قرر "عمرو.م" أن يتلصص على عالم المنتديات النسائية، ويحكى لـ"اليوم السابع": "أكتر حاجة بتخلى الشباب يدخلوا المنتديات دى هى كلمة "للبنات فقط" و"ممنوع دخول الرجال"، وفى الوقت نفسه احنا بنبقى عايزين نعرف البنات بيفكروا إزاى، بس دا كان فى فترة المراهقة وبس".

وتابع: "ما كنتش بعمل اسم مستخدم طالما كل حاجة مفتوحة وبقدر أشوفها، بس لو المنتدى اشترط إنى أسجل كنت بسجل باسم عادى مش باسم بنت".

"دخلت عالم جروبات التجميل وعرفت حاجات أول مرة أشوفها"

هذا الفضول تجاه "عالم البنات" لم يقتصر على المنتديات فحسب، فتجربة "أحمد. ع" كانت مختلفة، حيث قاده حساب مزيف باسم فتاة على "فيس بوك" إلى عالم "جروبات البنات" على الموقع نفسه، بعد أن تلقى دعوة من إحدى التاجرات الإلكترونيات، ويحكى أحمد: "أول مرة دخلت جروب بنات شفت حاجات غريبة أو مرة أشوفها ومكنتش متخيل إنها بتتباع فى مصر أو إن مصريين بيدوروا عليها، بعدها دخلت جروبات بنات عادية من بتاعة منتجات التجميل، وقعدت اتفرجت شوية من باب الفضول والاستكشاف وبعد شوية وقت خرجت منها".

وأضاف: "رأيى فى البنات لم يتغير بسبب (الجروبات) لكن اكتشفت حاجات مكنتش أعرف عنها حاجة، بما إنى غير متزوج، وعمرى ما شفت البنت اللى بتهتم بالموضة والجمال تافهين إلا إذا كانت الحاجات دى كل محور حياتهم".

"الكبت والفضول لاستكشاف عالم غريب كان السبب"

"عالم حوارات البنات بالنسبة لنا غريب وعندنا فضول نستكشفه علشان من واحنا صغيرين فى كبت وتقفيل زيادة عن اللزوم"، هكذا برر "عبد الله.م" دخوله المنتديات النسائية وقال "الاهتمام بالموضة والمنتجات النسائية واهتمامات البنات انتقل لى من خلال خطيبتى، وهى اهتمامات عادية بتخلينى أشترك فى صفحات مكياج وأظافر، والأساس كان الفضول هو اللى بيشدنى لعالم مجهول بالنسبة لى، خاصة أن معارفى من النساء محدودة، وفى إطار محدود، فبقى عندى فضول استكشف العالم الغريب عنى".

"مواضيع الأكل والتجميل أحيانًا.. والتسلية أوقات"

لأسباب بعيدة تمامًا عن التعرف على عالم البنات المغلق قرر "عادل.ف" أن يدخل المنتديات النسائية ويحكى لـ"اليوم السابع": "كنت وما زلت بدخل منتديات البنات علشان مواضيع الأكل والتجميل، كمان كان عندى مشكلة ليها علاقة بحب الشباب فكنت بعمل بحث عن العلاجات وبيوصلنى للمنتديات النسائية"، ويستدرك "بدخلها كمان للتسلية لأنه بصراحة كلامهم عن العلاقات بيضحكنى، خاصة إنى أعرف بنات كتير فعارف كويس طريقة تفكير البنات".