ناخب من بنى سويف: "نزلت أنتخب بالعجلة عشان البلد محتاجة لكل صوت فيها"

حضر مواطن مسن إلى لجنة الشهيد عبد الصمد على عزوز بمركز بنى سويف ليدلى بصوته الانتخابى، وهو يقود عجلة.

وقال عم جمعة، "حضرت انتخابات كتير ومكناش بنهتم زمان بمين ينجح ومين مينجحش بس الوضع دلوقت اختلف، البلد محتاجة لكل صوت فيها، لان الصوت هيفرق".

وطلب عم جمعة من الشباب الجالسين بأجهزة الكمبيوتر أمام مدرسة الشهيد عبد الصمد على عزوز بمركز بنى سويف أن يستخرجوا له رقمه الانتخابى، لكى يدلى بصوته.

وقال عم جمعة: "أنا جيت بالعجلة بتاعتى لأنى مش هقدر أمشى من البيت لحد اللجنة، وصممت انى أنتخب عشان عجلة البلد تمشى، عشان الشباب اللى قاعد على القهاوى يلاقى شغل".

وعندما سأله أحد الجالسين هتنتخب مين أجاب بابتسامة "الناس دلوقت واعية وعارفة هى بتعمل إيه الفلاح بيفهم فى السياسة أحسن من خريج الجامعة، المهم ننتخب صح".

ويتنافس فى الدوائر الـ7 لمحافظة بنى سويف 159 مرشحا على 14 مقعدًا فردياً، ويبلغ عدد اللجان الفرعية 843 وعدد الذين يحق لهم التصويت مليونا و600 ألف مواطن.

وفى الدائرة الأولى "مركز وبندر بنى سويف" يتنافس 37 مرشحًا على ثلاثة مقاعد، وفى الدائرة الثانية "مركز الواسطى" يتنافس 24 مرشحًا على مقعدين، ويتنافس 27 مرشحًا فى الدائرة الثالثة "مركز ناصر" على مقعدين، وفى الدائرة الرابعة "مركز ببا" يتنافس 23 مرشحًا على مقعدين، وفى الدائرة الخامسة "مركز إهناسيا" يتنافس 13 مرشحًا على مقعدين، وفى الدائرة السادسة "مركز الفشن" يتنافس 25 مرشحًا على مقعدين، وفى الدائرة السابعة "مركز سمسطا" يتنافس 12 مرشحًا على مقعد واحد.

كما يصوت الناخبون لاختيار قائمة من الـ4 المتنافسة فى قطاع شمال ووسط وجنوب الصعيد وهى "فى حب مصر" و"ائتلاف الجبهة الوطنية وتيار الاستقلال" و"نداء مصر" و"كتلة الصحوة الوطنية المستقلة".

ويضم قطاع الصعيد محافظات "الجيزة وبنى سويف والمنيا وأسيوط وسوهاج والأقصر وقنا وأسوان الفيوم والوادى الجديد والبحر الأحمر"، لتفوز قائمة واحدة بـ45 نائبا فى برلمان 2015.