من "كُل عشان تكبر" للضرب بالشبشب.. طرق الأم المصرية لإقناع الطفل بالأكل

"كل عشان تكبر ويبقى عندك عضلات.. كل وأنا أجيبلك حاجة حلوة.. لو مكلتش هحط السيخ المحمى فى صرصور ودنك".. طرق مختلفة تتبعها نماذج محتلفة من الأمهات لإقناع أطفالهن بتناول الطعام كله دون ترك بقايا فى الطبق، وهذه معاناة كل الأمهات، تعرفى على طرق كل أم فى إقناع أطفالها بالأكل.

تقول شيماء أحمد لـ"اليوم السابع" إنها لا تجرى وراء أطفالها حتى يتناولون الطعام ولا تضربهم، لكن تتركهم حتى يشعرون بالجوع وحينها يضطرون لتناول الطعام بسهولة.

وهذا ما اتفقت عليه إيمان حسن التى ترى أن "اللى ياكل على ضرسه ينفع نفسه" وأن الطفل يضطر لتناول الطعام عندما يجوع، مضيفة أن الضرب والجرى وراء الطفل أمر خاطئ و"دلع" له، لذا يجب أن تتركيه يجرب و"تضعى على قلبك حجر"، وعندما يشعر بالجوع سوف يطلب الطعام بنفسه.

نورا على توضح "أنا بلعب مع ابنى لعبة الرست وأقوله لو عايز تغلبنى خلص طبقك كله عشان تبقى عندك عضلات وتبقى قوى وأخليه يخلص الطبق ويغلبنى"، مضيفة أن هذه الطريقة تنجح معها فى إقناع الطفل بالطعام.

وتضيف همس محمود "بقول لبنتى لازم تعرفى أن الأكل ده نعمة ربنا ولو مخلصتيهوش ربنا هيزعل منك، وفعلا بتاكل عشان ربنا يحبها".

وتقول لمياء محمود "الضرب هو الحل بالحزام والعصاية والشبشب وكل أدوات الأم المصرية، لأن العيال عفاريت ومش بيجوا غير بالضرب".