مرتضى منصور يواصل هجومه على فيريرا: يافاشل يامغرور أنا اللى بتشتم فى الآخر

قال المستشار مرتضى منصور، رئيس مجلس إدارة نادى الزمالك، فى تصريحات خاصة لـ"اليوم السابع": "فريرا راجل عندى ومغرور وغبى واتحذر 100 مرة، وبطولة الدورى مش هو اللى جابها، بطولة الدورى نتاج جهد لعيبة أولا ومش ها أقول مجلس إدارة لكنه جهد لاعبين وأجهزة فنية سابقة حسام حسن وإبراهيم حسن وميدو ومحمد صلاح، فيريرا استلم الفريق وهو الأول وفرق 8 بنط وجبناله أفضل لاعبين، وفى الآخر اتغلب من إنبى والمقاصة وأودى دجلة واتغلب من الأهلى 2 /صفر، وضيع مننا الكونفدرالية للأسف الشديد بالغباء بتاعه".


وأشار رئيس نادى الزمالك إلى أن فيريرا كاره إبراهيم عبد الخالق لأنه مش هو اللى جايبه لكن اللجنة التى شكلها المجلس هى اللى جايباه، وقال كل اللاعبين اللى جابتهم اللجنة مش هاتلعب، كما أن فيريرا قال إن حمودى اللى جاى من سويسرا مش ها يلمس الكورة محمد سالم مش ها يلعب، إذا أنت هنا جاى تدمر الفريق بقا وغير كده المدرب مش عايز أيمن حفنى ومش عايز دويدار.

وأضاف مرتضى: "جبتله أحمد سمير أحسن باك شمال خلص عليه فى كل هذه الأحداث نحن ننصح مرة واتنين وتلاته داخل الغرف المغلقة آخرها يوم الماتش سألته عن دويدار وطارق حامد وأخبرته أننى آسف لأن بهذا التشكيل سوف نتغلب فقال لى أنا أتحمل المسئولية وقلتله كلامى واضح لو اتهزمنا "هتمشى" وقلت يا إسماعيل يا يوسف بلغ رسالة واضحة فى وجود المترجمين ورد فيريرا قال أنا المدير الفنى وانا اللى اتحكم وانا اللى اتكلم فقلت له وانت اللى تشيل الشيلة".

وواصل المستشار مرتضى منصور هجومه على فيريرا قائلا: "انت مدرب فاشل ومغرور وما يهمنيش الجمهور اللى عايز يقعده يروح يقعده فى بيته ويضرب عنده فى البيت وهو مش عايز يتعلم، والنادى مش عزبة وأى حد من الجمهور مش عاجبه يشرب من النيل وأنا اللى بادير وأنا اتحمل المسئولية لما بنتقلب با أتشتم ولما نفوز فريرا يحمل على الأعناق".

وقال إن المرشحين لتولى المصريين للمهمة هما طارق مصطفى ومحمد صلاح ومدحت عيد الهادى بدلا من علاء.