غضب رواد "فيس بوك" من بوست ناشطة تنتقد ملابس "مرابطات الأقصى".. مستخدمو مواقع التوصل يصفون تصريحات الناشطة بـ"الوقاحة فى أزهى صورها".. ويؤكدون: "الناس دى بيقاومو مغتصبين لأرضهم وأحسن من ناس كتير"

أثار "بوست" لإحدى الناشطات على موقع التواصل الاجتماعى "فيس بوك" حول ملابس فتيات الأقصى أو مرابطات الأقصى عاصفة من الانتقادات وسيل من الهجوم على الناشطة لتركها القضية الرئيسية والأعمال البطولية التى تقوم بها مرابطات الأقصى ضد قوات الاحتلال الإسرائيلى والالتفات إلى أشياء تافه واختصار ما يقومن به من بطولات فى الحجاب والملابس.

نص التدوينة التى أشعلت الأجواء على الفيس بوك
وجاء فى تدوينة الناشطة أميمة الحلبى، التى قوبلت بسيل من الانتفاضات من النشطاء على موقع التواصل الاجتماعى فيس بوك: "هو فى نصر هييجى بالمناظر اللى البنات فيها دى إيه البناطيل المحزقة دى والتيشرتات وبشعرهم وتشمير الكمام أيه ده.. هما دول مرابطات الأقصى.. طب طبقى فرض الحجاب الأول وبعدين إنزلى قاومى وجاهدى براحتك".

تعليقات النشطاء الغاضبة على التدوينة

وانهالت التعليقات الغاضبة والرافضة لمثل تلك الآراء على التدوينة المتداولة، فقال أحد النشطاء: "فعلا ربنا يرحمنا بس من أمثالكم اللى شايفين الدين فى حجاب وبس وشايفين دول مش محترمين ومش عندهم دين وهم بيضحوا بنفسهم وعندهم شجاعة عمركم ما هتوصلولها أبداً، اللى بيعملوه دول هو الدين والأخلاق والشجاعة والاحترام وكل حاجه حلوة".

وأضاف أحد رواد فيس بوك غاضبا من التدوينة: "كل اللى بنعمله نعلق عليهم وهم أحسن وأنظف مننا ميه مرة، نزل أى واحدة تناضل معاهم وتجمع الطوب وتلقيه على القوات الاحتلال الصهيونى مش هتقدر تعمل حاجة كفاية قرف وتنظير مرابطات الأقصى دول أحسن من ألف واحدة بتكلم عليهم، وبعدين أما تعرفى تعملى ربع اللى بيعملوه ابقى أكلمى مشيراً يكفيها فخر وشرف أنها بتناضل وبتحارب علشان بلدها".

وعلقت إحدى رواد فيس بوك، قائلة: "أنا شايفة أن الناس دى أحسن وأنظف من ناس كتير.. أحنا شعب معروف بتقيم الغير.. كفاية بقى ودعو الخلق للخالق.. مش لازم تنزلى صور وتعليقات مش لطيفة.. الله أعلم دول وضعهم أيه أحنا خارج الديره ربنا وحده يعلم داخل الدايرة الدنيا أيه ربنا يحفظهم وينصرهم".

وأشارت إحدى رواد "فيس بوك" إلى أن البوست المتداول يدل على غباء صاحبته، قائلة: "المعنى الحرفى للتخلف والغباوة متجمعين فى البوست، مش عارفه إزاى جايلها نفس تتكلم عن بنطلونات بنات شايلين حجارة وبيضربوا بيها صهاينة مغتصبين لبلدهم وأرضهم، وهى قاعدة على النت وبدل ما تدعيلهم أو تقول كلام محترم عنهم بتنتقدهم ‏الوقاحة فى أزهى صورها".

وتابعت تيسير سيد، قائلة: "معلش يعنى عشان بتدافع عن بلدها والأقصى لازم تتحجب واحدة بتنزل وبتضحى بشبابها وحياتها عشان تحمى بلدها واحدة نازلة من بيتها ومش عارفة هى راجعة تانى ولا لاء.. وفى الآخر تيجى واحدة زيك تتريق عليها ولا آخر جملة كتبتيها وقد ايه أنتى مستهترة باللى بيعملوه طب إنزلى أنتى ورينا المرابطة، ربنا معاهم وينصرهم يارب على أعدائهم".

واستطرد على محمود، فى تدوينة له قائلاً: "الفلسطينيات يناضلن من أجل قضية، ونحن قاعدين نحلل ونناقش هل النضال جائز بلا حجاب من يرى نفسه أهلا لتغيير هذا الواقع فليخرج، وليكن قدوة لهن فى النضال، ما دمت قاعدا أمام الشاشة وجب عليك الصمت، مثل هذه الأفكار لا تحتاج إلى تحليل ونقاش، الله ينصركن ويثبت أقدامكن يا فلسطينيات، هؤلاء أشرف من الذين صدعوا رؤوسنا ليل نهار عن الشرف والوطنية".

ووجه أحد رواد مواقع التواصل كل التحية لمرابطات الأقصى داعيا الله لهم بالنصر والقوة، مضيفاً: "أن فتيات الأقصى مهما كانت ظروفهم أو لبسهم أو ديانتهم أرجل من شباب كتير قاعد على القهوة مبيفكرش غير فى ماتشات الدورى الأوربى وهمه الشاغل رونالدوا أحسن ولا ميسى".

فيما قالت إحدى الناشطات الغاضبة: "آه فى نصر بيجى بالمناظر ناس محاصرة وبيوت مهدومة ما أنتم كان عندكم الإخوان ما انتصرتوش يعنى الدين مش لَبْس عندكم كمان منقبات بيرقصوا بشوارع حسبى الله ونعم الوكيل جاى تحكى عن لَبْس المناضلات إلى بتدافع عن أرضها ووطنها وما بتحكيش عن الصهاينة إلى كل يوم بتعتقل البنات وبدوس على شرفهم حسبى الله ونعم الوكيل كمان مرة".