"حذاء" شيرين يتسبب فى انقسام على "فيس بوك".. تصرفات المطربة بـthe voice تثير الجدل.. المهاجمون: "فضحانا فى المنطقة والفضائيات".. والمدافعون: تلقائية وعلى طبيعتها وكل واحد يخليه فى حاله

دائما ما يواجه النجوم ومشاهير الفن العديد من المشاكل بسبب عفويتهم وتلقائيتهم أمام الكاميرات، ومؤخراً تعرضت المطربة شيرين عبد الوهاب، لسيل من الانتقادات بسبب تصرفاتها فى برنامج the voice مثل طريقة جلستها وأخيرا خلعها لحذائها والضغط به على زر التصويت.

وانقسمت الآراء حول الفنانة شيرين عبد الوهاب التى دائما ما تلفت الأنظار إليها خاصة على رفعها لقدمها أثناء الجلوس على مقعدها بـ "the voice"، فهناك من انتقدوا الفنانة على ما فعلته وجعلوه مادة دسمة للسخرية حيث تداولت بعض الصفحات المتخصصة فى "الكوميكس" على الفيس بوك، صور ساخرة لها وقالوا "اللى فضحانا فى الفضائيات".

فى حين جاءت آراء أخرى تدافع عنها حيث رأت أن شيرين دائما عفوية وتتصرف بطبيعتها أمام الكاميرا، فتداول رواد موقع التواصل الاجتماعى فيس بوك صوراً للنجم الأمريكى آشر فى برنامج اختيار المواهب the voice بنسخته الأمريكية يجلس بطبيعته أمام الكاميرا، وكتبوا على الصورة قائلين، "الاثنين قاعدين نفس القاعدة على فكرة، الفرق أنه راجل وأنها ست والاثنين فنانين وليهم اسمهم فى مجالهم، فى أمريكا محفلوش عليه ولا قالوا اللى فاضحنا ومجرسانا فى التليفزيون، لكن إحنا هنا نعشق كده ونموت فى التنقاض ونمسك ذله على الناس، الاتنين على طبيعتهم على فكرة هى مش قاعدة فى بيتك ولا بتاكل من فلوسك ما تخليك فى حالك وتشوف فضايحك أنت".

وقالت منال موسى تعليقا على الفنانة شيرين، "أنا أكتر حاجة عجبانى انها طبيعية لا بتمثل ولا بتتكبر ولا بتتمحن، انتو اللى عقليتكوا معاقة، وبقارن شيرين بآشر آه عشان الاثنين طينة واحدة ورب واحد خالقهم، الفرق فى الجنسية".

وتابعت أخرى، قائلة "إنسانة طبيعية جداً وطيبة جداً والمشكلة مش فيها فعقول كل واحد شايف أنها غلط ما كل واحد يعقد زى ما هو عاوز ليه أى حد طبيعى وتلقائى بيتهاجم ما كل واحد يخليه فى نفسه أحسن هنبقى أحسن بدل التريقة والتنظير ده".

وقالت إحدى المدونات، "إحنا إننا نمسك فى الهايفة وخلاص ما تقعد زى ما تقعد، يعنى لو واحدة قاعدة وبتضحك وجه حد متعرفهوش قال متقعدى كويس واتكلمى عدل، أى حد هيقول ملكش دعوة أنا حرة إحنا اتخلقنا أحرار محدش ييجى يتحكم فينا، ما كل واحد يشوف عيوبه ويخليه فى نفسه وكل واحد فى عيوب الدنيا".

جدير بالذكر أن الفنانة شيرين عبد الوهاب اعتذرت لجمهورها على ما فعلته عبر تسجيل صوتى لها على حسابها الشخصى على موقع التواصل الاجتماعى فيس بوك، قالت فيه "عايزة أقدم اعتذار رسمى لكل الوطن العربى على موضوع الحذاء، بس أنا بتعامل مع زرار، أكيد انتوا حابين تشوفونى فى أحسن صورة، وحابين دايمًا تشوفونى مبغلطش، وأكيد انتوا صح وأنا اللى غلط، وأنا آسفة مرة كمان".

موضوعات متعلقة..

شيرين معتذرة عن خلع حذائها بـ"the voice": "أنا كنت بتعامل مع زرار"


بالفيديو والصور..على الفيس بوك.. شيرين وأطاطا "مايفرقوش كتير عن بعض"