ولا كل اللى شال مصر ف ضميره
ولا كلّ اللى داس ع النار وخطّى
ولا يتساوى قلب اختار مصيره
بكلب اندار عن العشّاق ووطّى
تعب قطر الغلابه ف خط سيره
وبعد دا كلّه لسّاه فى المحطّه
................
رصاص الغدر طايش زى ناسه
وقلب الغدر معجون بالغباوه
يا نيل من ساسه متقيّد لراسه
يا صَمت الحق يا خيطان الغشاوه
يا دمع العين يا موجوع باحتباسه
رصاص الغدر مبدع فى النقاوه
على عينك يا تاجر خد ميراثه
وراجع تانى وبنفس الضراوه
رصاص الغدر داخل وبمداسه
وقلب البنت سجّادة حلاوه
**********
أنا الأخرس وأنا المنصاب فى جوفى
وصوتك فى الميدان زلزل حروفى
صراخك هزّ أوصالى وقتلنى
وعوّدنى إنى أقف بسلاح لخوفى
.................................
أنا اللى قريت عيونك فى القصايد
وكان حرفى فى كلامك مش محايد
سمعتك فى الميدان ما قدرتش أرجع
ولو هيزيِّنوا بصورتى الجرايد
**********
رصاص الغدر طايش فى المداين
وضحكة روحك الطوّافه آيه
ولو كل اللى مات بالعشق خاين
ف يبقى الموت ماهوش محتاج وصايه
يا نيل شارب وجع والدم هاين
ما ينفعش الجدع يلبس ملايه
ما ينفعش اللى عاش يزرع جناين
نبرّر خرجته بقايمة خطايا
رصاص الغدر بيبيع فى الرهاين
وقلب البنت سجّادة صلايا
**********
أنا المضطر أقول: مضطر أغنى
وأنا المضطر أقول لك: غصب عنّى
وانا المضطر رغم إن اضطرارى
ما بيدينش اللى باعك واللى خاننى
............................
أنا المضطر يا ام الصوت سماوى
أقف واهتف على كل القهاوى
يا كل المرعوبين من كل حاجه
ما عادتش الحق والخوف بالتساوى
**********
سعيد شحاتة
الشاعر سعيد شحاتة
