"أنا بنام أنا وولادى فى الشارع بقالى كذا يوم" هذه كلمات الحاج حافظ عيد وهو بواب إحدى العمارات بالحى والأكثر ضررًا لهذا المشهد، والذى قال لـ"اليوم السابع": "بقالى أسبوع مبعرفش أنام بسبب المياه اللى مغرقة الأوضة والجراج اللى قاعد فيه ومش لاقى مكان أبات فيه غير الشارع لحد ما يتم إصلاح الماسورة، وبنكلمهم كتير ومبيردوش ولما ردو بردو مفيش فايدة أنا عاوز حل لمشكلتى لأنى تعبت وفى الجو والسقعة دى مينفعش الواحد ينام فى الشارع هو وعياله".
المهندس نادى حلمى أحد سكان العمائر والمتضررين قال: "المشكلة بدأت منذ يوم 7 يناير بانفجار ماسورة مياه بالحى كله ومش عارفين السبب فورًا اتصلت بشرطة طوارئ المياه ولكن لا يوجد رد "تاركين رسالة مسجلة باللغة الأجنبية" واستمرت فى الاتصال بهم ولكن لا حياة لمن تنادى، واستعنت فورًا بالشرطة وبلغتهم وردوا قائلين: "هنبعت حد يشوف المشكلة" وبالفعل أرسلوا ناس واشتغلوا فى المكان بآلالات كثيرة وحفر وفى الآخر تركوا الأمر أسوأ مما كان عليه، ويوم الخميس اتصلنا تانى محدش رد، وفى ظابط اعرفه قالى الشرطة مبتسجلش بيانات أقصى حاجة يبلغ فقط، وفى يوم الجمعة المياه زادت جدًا ودى مياه شرب هما كل إلى عملوه هو قطع المياه علينا كل شوية".
وأضاف: "بنشتكى من إهدار مياه النيل والحكومة هى المهملة فيها دى مياه شرب إزاى تتسرب على مياه المجارى والمخلفات حرام إنها تترمى على الأرض لازم يكون فيه وعى واهتمام ببلدنا أكثر من كده، النظام السابق لما كان حبيب العادلى وزير داخلية كان ساكن بجوارنا كانت مفيش أى مشاكل لما كانت لمبة بس تبوظ بالشارع كانت بتتصلح".
ومن جانب آخر قال محمد شحاتة أحد العمال بالمنطقة: "عندما شاهدت كمية المياه الرهيبة فورًا بلغت السكان وقاموا بالاتصال وعندما جاءت شرطة المياه وبعد الحفر الكثير لمدة 12 ساعة قالوا لنا السبب من بعيد وإحنا مش عارفين منين ومشيوا وسابونا وإحنا مش عارفين نشتغل وكل حاجة متعطلة ومش عارفين نعمل ايه والمشكلة الكبرى إن فى وسط هذه المياه كابينة كهرباء من الممكن أن يحدث ماس كهربائى ويضيع فيها أروح الناس".
"اليوم السابع" تحدث إلى "راضى أمين" سكرتير عام مساعد محافظة الجيزة الذى لم يكن لديه أى علم بالواقعة مؤكدًا أنه سوف يتصل فورًا برئيس حى العجوزة والمسئولين هناك وسيعملون على حل المشكلة فى أسرع وقت وفى المقابل اعترف اللواء "أحمد عبد الرحيم" رئيس حى العجوزة بتلقى الحى شكاوى وبلاغات من الأهالى بخصوص هذا الأمر.
وأضاف فى تصريحات لـ"اليوم السابع": أن السبب وراء انفجار الماسورة ما زال مجهولاً مؤكدًا أن الحى متواجد فى المنطقة بشكل يومى منذ وقوع المشكلة ويعمل بالتنسيق مع طوارئ شرطة المياه على إصلاح الماسورة وحل الأزمة.
تم أضافة تعليقك سوف يظهر بعد المراجعة