محمد دويدار يكتب: قبل الجواز حاجات كتير لازم تعملها

نصائح للشاب المفلس المقبل عل الزواج ..
* إذا طلبتها للزواج وقالتلك هعمل استخارة فهى غالبا ترفضك بطريقة الفتاة المتدينة فلا تسألها مرة أخرى عن نتيجة الاستخارة كى لاتصدمك أنها رأت كلبا أسود فى رؤياها
* إذا قالتلك مبفكرش فى الكلام ده دلوقتى فهى ترفضك بطريقة الفتاة العملية وغالبا ستراها بعد أسبوعين فى الكوشه مع عريس إمكانياته أفضل منك.
* إذا قالت لك أنا ماليش رأى الرأى رأى بابا وماما فهى غالبا ترفضك بطريقة الفتاة المحافظة ومن الأفضل ألا تذهب لبابا وماما لأنهم هيهروك أسئلة واستجوابات وفى النهاية هيقولوك.. للأسف يا ابنى بنتنا صغيرة عالجواز.
* إذا قالتلك روح لأمك فلازم تروح لأمك بسرعة لأنها ترفضك بطريقة الفتاة "البيئة" ودى لو طولت معاها فى لكلام هيبقى نهار أبوك وأمك أسود
* إذا قالت لك أنت فاجئتنى أنا محتاجة أفكر.. فهى غالبا هترفضك بطريقة الفتاة المادية.. هى فعلا هتفكر وهتفاضل بينك وبين الفرص البديلة المتاحة لها.. ودى ملهاش أمان لأنها فى أى وقت هتسيبك لو جالها فرصة أفضل.
* إذا سكتت ووطت رأسها ومشيت فأوعى تبقى عبيط وتفتكر إنها وافقت وإن السكوت علامة الرضا.. ده كان زمان يا عبيط.. دلوقتى رضا بأه بجح ووشه مكشوف.. يعنى يا أهبل هيه لو عايزاك هتلاقيها هيه وأبوها وأمها بيجروا وراك عشان ينولو الرضا.

وأخيرا استريح بأه وإهمد واشتغل شويه وحوشلك قرشين عشان شكلك انت وأهلك ميبقاش وحش فكل مرة هتترفض فيها.