احتراف إيه.. والكورة مع الحلنجية.. والطب الرياضى فى الحتة ديّا!

* من غير المسموح أن نظل نؤكد أن الاحتراف يجب أن يشمل كل جوانب الحياة الرياضية، فى الوقت نفسه نجد ألوان «اللخبطة» تلون كل شىء حولنا!

لاعب رايح يتعالج فى الخارج.. وقبل الخارج بشوية كمان.. يعنى فى الإمارات وقطر.. والآن يبنى الأهلى فريق عمل لتأهيل المصابين بنظام يدخله شقيق سودانى الأصل، هو محمد آدم ونحن يجب أن نفخر به بالطبع.

لكن بعد كل ده.. لسه فيه اللى يتكلموا عن الطب الرياضى القاطن بوزارة الرياضة فى شبه دور كامل.. وعرفنا إن فيه ناس بتدى حقن مع إنهم «دبلون تجارة».. وآخرين مدلكين مع إنهم مجرد موظفين بشهادة ولو جامعية، وأدوات مصرية، ومعامل الحاجات فيها مرمية!
لو فيه احتراف حقيقى ماكنش سكان الطب الرياضى بوزارة الرياضة يظلوا جالسين وكل سنة مجددين.. وإحنا لعيبتنا على بره مسافرين!

تخيلوا المصاريف التى تتكلفها رحلات العلاج، بينما تعجز فى مصر عن تقييم للشىء اللى اسمه «الطب الرياضى».. بس يظهر ليه ناس!

المصيبة أن تعرف عزيزى زائر اللطشة أن قليلين ربما لا يعبرون أصابع اليد الواحدة يحملون تراخيص تأهيل، بل أقل منهم جامعيون.. والمصيبة الأكبر أن هناك من يعملون فى أجهزة كبرى بالخبرة.. آى والله بالخبرة!

* ها.. يا سادة.. إيه رأيكم.. قال احتراف، طيب لو فيه احتراف حقيقى ينفع يعنى لما لاعب يوصل له عرض للعب فى الخارج بأرقام باليورو، تظل الأندية الهاوية والغاوية فشل متمسكة باللاعب علشان العِشرة والتربية!

طيب ينفع مانسمعش عن لفت نظر من الوزارة، أو حتى تقول لازم اللى يخرج لاعب صغير نديله فلوس كتير، بس إزاى والتجديد لكل الفشلة شغال على ودنه!

* ها.. نقول كمان.. ماشى.. نقول كمان.. احتراف إيه اللى فيه النادى مايقدرش يطلب من جهة حماية «منتجه».. ولو حتى بتهديد المزورين والمنتفعين، كمان احتراف إيه اللى فيه لاعب لسه يا عينى طالب فى الجامعة، رغم إنه موظف فى وظيفة بتدر عليه دخل محترم، لأ.. وقال إيه يطلبوا له العفو والسماح، وحل أزمة الامتحان!

* احتراف إيه اللى فيه اللاعب لو راح ينتقل من نادى إلى نادى كل مسؤول يخاف يقول، وكل رئيس يخرج بسرعة قبل الفاكس ما يوصل يلحق تاكسى!

* بكل تأكيد الاحتراف مش قرار، ده إرادة تحتاج إدارة وقوانين بدل حضرات الأفاضل اللى قاعدين يخرجوا قوانين للسنين اللى هايقضوها على قلب الرياضة.. حتى لو أنجزوا!
يعنى ببساطة بدل خناقة الـ8 سنين واللى ماشين، واللى جايين فيه اقتراح شيك، لو الدولة مش عاوزة «رغى» كتير، لازم قانون الرياضة يخرج كرة القدم المجنونة بنت المجنونة من حيز عدد السنين، وتتحول لإدارة أصحابه، هم أصحاب الفلوس، يعنى كل واحد بيصرف من جيبه.. وقتها والله هتلاقوا الطلب أن دورة المجلس فى النادى تكون 8 شهور مش 8 سنين!

* آخر حاجة فى الاحتراف عايز أقول لـ«خيشة الكداب قوى»: فيه ناس هاتقاوم فكرة احتراف لاعبين كتير.. كتير.. بره.. إيه بتقولوا.. ليه؟! علشان قوام المنتخب مايجيش من بلاد برة.. والسبوبة تفضل مع الأسطوات والحلنجية فى الكرة الداخلية.