.. "لبيبة" تروى مأساتها فى محكمة الأسرة لـ"اليوم السابع": جوزى أتجوز عليا ورمانى وابنى العاجز فى الشارع.. "سامح": نفسى ابقى بنى آدم وأشيل هم الست العجوزة اللى بتصرف عليا

"جوزى رمانى فى الشارع وطلقنى ولولا ولاد الحلال كنا موتنا من الجوع نفسى اطمن على ابنى قبل ما اموت" هذه الكلمات قالتها المطلقة لبيبة التى تقطن وابنها المصاب بعجز بإحدى الغرف بالجيزة.

وتابعت "لبيبة" تحكى مأساتها مع الطلاق لـ"اليوم السابع": "عشت مع زوجى سنوات طويلة وأنجبت منه 3 أولاد ولكنه كان فقيرا لا يمتلك الكثير من الأموال ويرفض أن يصرف علينا ولكننى تحملت فأين سأذهب بأولادى, إلى أن أراد الله أن يمتحن صبرى أكثر فضاعت ابنتى الصغيرة وعانيت بعدها وأنا أبحث عليها بمفردى فزوجى لم يهمه الأمر لأنه ارتاح من حملها".

وأكملت "لبيبة": "فى يوم دخل عليا وبصحبته فتاة تصغره بكثير وقال لى (عاجبك عيشى معانا..مش عاجبك الباب يفوت جمل) سكت مجبرة وتحملت الإهانة والعذاب منها فانا ليس لدى أحد إلى أن تزوج ابنى الأكبر, وبعدها طردنى زوجى وابنى وقال لى (خدى العاجز اللى بالتينا بيه وامشى) وطلقنى ولولا ولاد الحلال اللى ساعدونى كان زمانا متنا من الجوع".

وقالت لبيبة فى حزن: "لما بقينا فى الشارع أنا وابنى واحد جاب لينا الأوضه اللى عايشين فيها والسرير اللى بنام عليه.. الحمد الله رغم أننا ملناش باب نقفله علينا ذى اللى عايشين فى الشارع".

فيما قال سامح: "إصابتى بالعجز فى قدمى اليمنى بتخلينى مش باقدر اشتغل ومصاب بحالة اكتئاب.. أنا مش باخرج من الأوضه ومضايق من القعدة نفسى ابقى بنى ادم واشتغل عشان اعرف أشيل امى مش هى اللى تشيلنى باندبح لما بتطلع أمى تحاول تلاقى أكل ليا وأنا قاعد عاجز".

وتابع "سامح": "أنا مش بفكر فى نفسى ولا حتى ابقى ذى صحابى وأتجوز لانى عارف أنى فقير مش عارف اعمل حاجه متكتف وواقف محلك سر, ولعت فى نفسى بسبب الخنقه اللى عايش فيها آنا مش كااافر بس الفقر وحش ربنا ما يوريه لحد انك تحس انك عايش اقل من الحيوان يخليك مش عارف تتنفس".

وأكمل "سامح": "والدى مش بيسأل فينا رغم ظروفنا, ربنا يعلم رغم الظلم اللى عمله فينا باعامله بما يرضى الله, أنا كل اللى نفسى فيه محتجش لحد، مليش حد غير أمى لولاها معرفش كان حصل ليا إيه, عايشين فى الأوضه مفهاش غير السرير وعندنا حمام مشترك لأكتر من 9 عائلات".

فيما أنهت "لبيبة" قائله "أنا تعبت ومبقتش قادرة استحمل نفسى أموت وأنا مرتاحة ومطمنه على ابنى".

الأطفال ضحايا الخلافات الأسرية والطلاق.. إحصائية تعلن: 41% من أبناء رواد محاكم الأسرة يعانون اضطرابا نفسيا.. علم الاجتماع: الخلافات تصيب الأطفال بالعدوانية.. والطب النفسى: صراع الكبار يدفع ثمنه الصغار