فيسبوك
واتساب
أنا مش مضطر على التعظيم ولا ع التألِيه
ولا مرغم أسلّم على فرّاش مكتب مولانا
وأقول له يا بيه
ولا عندى مرارة أضحك لحمار
وأقنع بردعته بأنّه نبيه
ولا علّمنى الريّس "حامد"
والدى أبو تلفيعه بنص جنيه
إنى أحْنى دماغى أمام مدفع
أو أطاطى لخيل شايل معاليه
ونصحنى إنى أتوضى بروحى
وأكتم نوحى
وان مُتّ يعيش فيّا طموحى
زى ما عاشت على كتفى إيديه
الموت ما بيقتلش الأرواح
بس الخوف بيذل المعاتيه
وأنا مش مضطر على التعظيم ولا ع التفخيم
ولا ع التأليه
لكن مضطر إنى أستأسد
وأصرخ للديب اللى ف وشّى
وأخزّق له عنيه
الغابه قانون
ميمون ما يصحّش يصبح فيل
والسبع ما ينزلش لميمون
والهدهد لو صار شامبليون
يبقى المضمون غير المضمون
والدون بكره يدلدل رجليه
أنا مش مضطر على الغابة
ولا ع القوانين الكدّابة
ولا ذل كلاب البوابة
ولا صوت الست الندّابة
ولا "بقرة حاحا" الحلابة
ولا دون ولا أفيال وديابة
ولا سبْع بناب لازمُه نيابه
السبع إن مات مين هيغطيه
والديب لو عَمّر واتنمّر
مين هيسمّى عليه ويسمّيه؟
الساعه خلاص خامسة صباحًا
جرس التنبيه
الواحد بادئ يتحرّك
علشان يتقابل مع عالم
ربّنا قادر ياخده يا يهديه
طالع مش مرغم ع التعظيم ولا ع التفخيم
ولا ع التأليه
ولا مرغم أسلّم على فرّاش مكتب مولانا
وأقول له يا بيه
لكن مضطر إنّى اتبسّم
وأنا مش عارف باتبسّم ليه
الشاعر سعيد شحاتة
