صلاح السنديونى يكتب: هى فين حريتى؟

هى كانت غلطتى.....لما جمعت قوتى
وطلبت يومها حريتى....وصرخت فيه
طلقنـــــــــــــــى....طلقنـــــــــــــــــــــى
وصدقنى.....وطلقنى
واتارى مآسى كتيـــــــــر
بتسبقنى.....وتلحقني
ابو مين اللى عايز يخدم
ويقوللى يا هانم ويا افندم
وابو مين اللى عايز يعزم
ع العشا والاقيه عمال يحلم
وعينيه بتقول.....بيعشقنى
وكل ست بتخاف منى على جوزها
كانت زمااااان....بتاخدنى فى اهلا وفى سهلا
دلوقتى تشوفنى
ماعرفش ازاى تلوى بوزها....
وكأنها ولا تعرفنى
حتى اخويا اللى كمان اقرب ليا
ساعات باحس انه بيشك فيا
فى الرايحة يسأل والجاية
وسؤاله طبعا يضايقنى
اما ان كلمت واحد م الحته والا زميلى
بتقوم الدنيا وما تقعدش
ويا ويلى يا سواد ليلى
لو اتكلم الاقى الكل يكدبنى
طب ليه يا ناس هو انا يعنى مش بنى ادمة
والا حقوق المرأة دى مالهاش لزمة
والا الحكاية ان فى ايد منا العصمة
هى كانت غلطتى.....لما طلبت حريتي
وهى فين حريتى ؟ هى فين حريتى ؟