فيسبوك
واتساب
وليه دايما تحاسبينى
على النومة
و ع القومة
و ع اللقمة اللى مقسومة
و ع السكة اللى مابتهداش
و ع الماضى
و ع اللى ماجاش
و ع العمر اللى مستناش
و ع الخطوة اللى محسومة !!
وليه تحاسبينى أنا لوحدى
لا كان ذنبى ولا جحدى
ولانكرانى لجميلك
وأنا اللى نحتى أزميلك
على الهامش رتوش باهتة
ودمعة تبل منديلك
بتاخد وقتها وتجف
وأنا الدايرة
وأنا اللى بلف
مستنى الوجيعة تخف
عشان يرجع يغنيلك !!
شوفيلك حل ف التوهه
وليالى التيه
وف الحكمة وف المعاتيه
وف قلبى اللى عذبتيه
شوفيلك حل ف الغربة
ف قلوب الناس
و ف الكره اللى ماله أساس
وف العالى اللى بات ينداس
على ترابك مادام بعتيه !!
صورة أرشيفية
