اللى سامعاه مش مفاجأة
أصلى بَطَّلت السكوت
هو إيه اللى هيبقى
بعد ما الإحساس يموت
النهاردة ...ده قرارى
تتقطع كل الخيوط
النهاردة... دا اختيارى
تتقفل كل الخطوط
مش صحيح إن القرار دا
وِصلتله كده مرة واحدة
البداية زمنها عدّى
والنهاية جَت النهاردة
كل يوم كَنت ليكى غلطة
حاجة بتضايق جديدة
واما جَت آخر محطة
كَانت نهاية مش سعيدة
عمرى ما شفت اهتمامك
أو فى يوم كان ليكى دور
كل كلمة من كلامك
كَت برد من غير شعور
لما كنت ف مرة بحزَن
عمرى ما لقيت لهفتِك
واما ييجى الوقت وافرح
عمرى ما اسمع ضحكتِك
كل يوم كانت هوايتك
اختلاف وخصام جديد
زى ما تقولى سعادتك
إنى أبقى مش سعيد
كل يوم فى مسافة بينّا
كل يوم عن قبله بُعد
ألف حاجة واقفه بينّا
واسمنا عايشين لبعض
لما نبعد مش هنتعب
والحكاية هتبقى سهلة
يبقى أحسن لمّا نهرب
من حياة صعبة و مُملة
مش هكمِّل باقى عمرى
يوم خصام مع يوم عتاب
انتى خدتى كل صبرى
وانتهى وقت الحساب
صورة أرشيفية
مشاركة
اضف تعليقاً واقرأ تعليقات القراء
مشاركة
