مواطنون: "نستحمل زيادة الأسعار أحسن ما نشحت من الخارج"

رصد اليوم السابع، أراء عدد من المواطنين، بعد قرار رئاسة الوزراء بارتفاع شرائح الوقود، حيث يقول أحمد، ١٤ سنة، "صنايعى"، أن أجرة المواصلات ارتفعت بشكل باهظ، والفقير يداس فى النهاية، ولو كان من الضرورة يزودا الأسعار يبقى نسبة بسيطة ووجه رسالة إلى محلب قائلا: "خفضوا الأسعار وارحمونا".

فى حين قال أشرف، ٣٣ سنة: "إحنا لازم نتحمل شوية عشان الاقتصاد واقع، بس المشكلة أن كل حاجة غليت مرة واحدة، وأنا مرتبى تأثر بنسبة ٥٠٪، يعنى إحنا عاوزين زيادة ٥٠٪ على مرتباتنا والمعاش عشان عدل ربنا".

ويضيف الحاج محمد: "اتقوا الله فى الشعب، والمفروض الزيادة تبقى على بنزين ٩5 مش ٨٠ بتاع الغلابة".

فيما يؤكد محمد بدر، ٦٠ سنة: "رفع الأسعار شئ لابد منه، وأهو أحسن ما البلد تغرق فى الضلمة ده حل كويس ولازم ناخد الدواء عشان مصر تخف وأحسن ما نمد أيدنا للخارج".

فى حين أشار مينا، ٤٦ سنة إلى أن أسعار الوقود زادت لأن البلد عاشت فى تدهور اقتصادى من سنوات، وارتفاع أسعار المواصلات هتخلينا نركب عجل بدل من الاوتوبيس، وأضاف إلياس ٥٤ سنة: "نستحمل أحسن ما نشحت من دول الخارج".