مصطفى طاحون يكتب: ضهر الهموم!

حمِّل على ضهرك هموم
واجمد يلاَ ..
كمِّل ووريهم
أصول المرجلةْ ..
اوعاك و قولة – آه –
ليضحك غِلُّهم ..
منت اللى زيك جنبهم
زى الورود ..
فـ المزبلةْ !

حمِّل على ضهر الهموم
رطلين كمان ..
اخمد براكين ثورتك
جواك وبان ..
وكأنك الحاكم لدنياك
الخلا ..
حمِّل على ضهرك هموم
واجمد يلا ..

ارمى الشهادة وسب
فـ ديانة علامك ..
عملك عبادة حتى لو
مش من مقامك ..
توك عرفت أن المناهج
جوه بلدك عنِّسوا ؟!
طب هاتلى يوم ..
كانلك قرار ..
أو فيه اختيار إيه تدرسه .. !
دا انت العلام
زيك تمام ..
بيعانى مليون مشكلة
حمِّل على ضهرك هموم
واجمد يلا ..
ادفن كرامتك فـ التراب
وبجزمتك ..
دوسها ولم فلوسها
وأنت فـ سكتك ..
و اشترى بيهم نفاق
تعلى مراتب
حضرتك ..
أو حتى هاتلك منصبين
أو سرقة حلوه ..
تقوِّتك !
و تخلصك من شغلتك
و البهدله ..
حمل على ضهرك هموم
واجمد يلا ..
وبالقانون كل الحرام
يصبح حلال ..
وفـ النهاية المتهم
هو البطل ..
حمِّل على كف الهموم
حقك ..
فـ دنياك انقتل
حمل على كف الهموم
روحك ..
متنساش الكفن
حكمة و قالوها
الطمعانين ..
إكرام ضميرك ..
يندفن !