محمد دويدار يكتب: فيسبوكاوى صوفى

الصوفيون .. مجانيين دراويش .. أم .. أتقياء زاهدين متعففين .. سؤال لم أجد إجابة مختصرة عنه، ولذلك فقد قررت أن أبحث أولا كى أصل إلى الحقيقة.. ولأنى فيسبوكاوى قديم فقد لاحظت فى الفترة الأخيرة أن الصوفية أصبحت موضة.. تلاقى البت لابسة الهوت شورت وكاتبه صوفية وتلاقى الواد لابس سلسلة ذهب ومتصور سيلفى عالشط فى مارينا ومع ذلك كاتب عن نفسه صوفى .. طبعا أنا ماسكتش وسألت هوه انتى ليه كاتبة إنك صوفية ممكن تعرفينى إيه هيه الصوفية.. فردت بثقة زايدة الصوفية دى إنك تحب ربنا أوى وتعمل اللى إنت عايزه بس المهم تحب ربنا..

يعنى إيه تعمل اللى إنت عايزه .. والنبى وضحيلى أحسن مش فاهم ؟
يعنى ترقص صلصا وتغنى راب وتلبس شورت مقطع وبادى كت.. بس لازم تكون بتحب ربنا أوى.. هنا لقيت الأخ الصوفى بتاع مارينا دخل فى الحديث بكومنت حاسم.. ياجماعة أهم شروط الصوفية هو الديرتى لوك ..

الديرتى لوك؟! يعنى إيه
الديرتى لوك ده يا عمو هوه إنك تسيب دقنك ما تحلقهاش.. تخليها منبتة شوية وتسيب شعرك ماتحلقوش تساوى بس، بس لعلمك يا عمو ده مش سهل أنا يوم اه ويوم لا بروح للكوافير عشان أحافظ عاللوك ده اه برافو يا حبيبى وبغض النظر عن عمو دى لكن بجد مجهود عليك لكن محدش هيبقى صوفى بسهولة يعنى لازم تتعب شوية...

تخيلوا.. هوه ده حال الشباب وتفكيرهم وفكرتهم عن الصوفية.. على فكرة أنا ما استغربتش من آراء الشباب دى لأنى أنا نفسى كانت معلوماتى عن الصوفية معلومات سطحية من خلال قراءات لأقوال الرومى أو لإيلاف ورائعتها قواعد العشق الأربعون .. وبعد دراسة وقراءة متعمقة قررت أن أوضح حقيقة الصوفية باختصار حتى لا تكون كلمة حق يقصد بها باطل
أشوفكم الحلقة الجاية.........