بالفيديو.. الطفل محمد يروى قصة اختطافه على يد بلطجية فى بولاق الدكرور.. عائلته: دفعنا 70 ألف جنيه علشان نرجعه.. والأم: الظابط قالى احمدى ربنا إن ابنك رجعلك

"وأنا ماشى فى الشارع وكنت جمب البيت وقفونى رجالة راكبين موتوسيكل وقالولى أبوك ليه عندنا فلوس تعالى نديهالك"، هكذا بدأ الطفل محمد يروى قصة اختطافه على يد بلطجية فى بولاق الدكرور.

أحمد والد الطفل وهو سائق ميكروباص بشارع السودان، قال إن طفله تم خطفه بالقرب من المنزل، مضيفا: "اللى خطفوه اتصلوا بيا وطلبوا 100 ألف جنيه.. ونزلناها لـ 70 ألفا، واستلفت الفلوس، وروحت آخد ابنى، وبعدها اتصلوا بيا، وعرفونى هما مين، وطلعوا بلطجية معروفين عندنا، وكانوا قتلوا واحد قبل كدا".

وأضاف، "هما واخدنها بلوى الدراع، وكل ما حد يكلمهم يقولوا إحنا معانا وسطة كبيرة، لدرجة إن قضية ابنى اتحفظت، على الرغم من أنى ذكرت أساميهم".

فيما قالت والدة "محمد": "لما عرفت إن ابنى اتخطف توجهت لقسم بولاق لتحرير محضر، ولكن لم يفدنى ضابط المباحث بشىء، وعندما اتصل البلطجية بزوجى، أخدت الرقم واديته للظابط ولم يفعل شيئا.. وبعد استرجاع ابنى ذهبت للقسم والضابط قالى "انتى مش جبتى ابنك يبقى خلاص احمدى ربنا"، وتوجهنا إلى قسم العجوزة بحجة أن مكان الخطف تابع له، وليس قسم بولاق، وهناك كرر الضابط نفس الكلام وهو "انتى مش جبتى ابنك احمدى ربنا".

وأضافت والدة محمد، "بيهددونا بخطف عيل من عيالى الأربعة عشان نتنازل عن القضية".