لحد امتى هتفضل عايش بمشاعر ناس تانيين
لو ضحكوا يكون ده وقت ضحكتك
لو حزنوا بتبقى نازلة دمعتك
جايز تقولى إنك طيب وبتحب تعيش لغيرك!
لو دا كلامك وده معناه ألف تحية كتر خيرك
بس سؤالى اللى أنا بسـأله
مين غيرك عارف مصلحتك ؟
مين غيرك هيعيش مصيرك ؟
مين غيرك هيبقى فاكرك زى ما أنت فاكر غيرك
من غيرك فى يوم ماتضيق هيبقى ليك صدر حنين
مين غيرك فى يوم ماتميل هيبقى جنبك كده ويميل
اسمع كلامى
أنا مش عايزك تبقى واحد مشاعره جافة زى الحجر
أنا مش عايزك تبقى واحد مصلحته بس وينسى البشر
مش ده اللى أنا عايزه خالص
أنا بس عايزك تبقى عارف أن حياتك لوحة ليك
يوم ما تفكر ترسم فيها لازم تبقى من صنع إيديك
ألوانك تبقى شكلك تبقى شبهك
تبقى روحك تبقى منك
هو ده اللى بقوله ليك واللى عايزك تفهمه
مهما كان طريقك صعب
محدش غيرك هيكملوا
أنا كده خلصت كلامى والباقى عليك أنت
تسمع كلامى أو ترميه أنا هسيبك زى ما أنت
بس هيفضل سؤالى ليك لحد امتى ؟!
دموع
مشاركة
اضف تعليقاً واقرأ تعليقات القراء
مشاركة
